Австралияда ноклардан тикув игналари топилди

Австралиянинг Мельбурн шаҳридаги дўконлардан сотиб олинган ноклардан тикув игналари топилди, деб ёзади «ТАСС» ABC телекомпаниясига таяниб.

Топилма ҳақида Виктория штати полициясига ABC ходимаси Клер Бонсер маълум қилган, у нок ичидаги игнани нонушта қилиш вақтида кўриб қолган.

«Мен ҳеч қандай шикастланиш олмадим, шунчаки нок еяётганимда, меванинг ичида игна ялтираб турганини кўриб қолдим», — деди аёл.

Игна санчилган нокларнинг иккинчи ўрами Сифорддаги Woolworths супермаркетлар тармоғи ходимлари томонидан топилган.

Виктория штати полицияси мевалардан игна топилиши билан боғлиқ янги ҳолатлар юзасидан текширув бошлади.

Аввалроқ Австралияда маҳаллий дўконларда сотилган қулупнайлар ичига тикув машинаси игнасини яширишда гумон қилинаётган 50 ёшли Ми Ут Тринх қўлга олинган эди.

Бундан аввал сентябрь ойидан австралияликлар қулупнайлар ичига яширинган тикув машинаси игналарини топа бошлагани ҳақида хабар берилган эди.