Австралияда маҳаллий дўконларда сотилган қулупнайлар ичига тикув машинаси игнасини яширишда гумон қилинаётган 50 ёшли Ми Ут Тринх қўлга олинди. Брисбен магистр суди уни гаров пули эвазига қўйиб юборишни рад этди ва 22 ноябрда бўлиб ўтадиган эшитувгача уни назорат остида қолдирди, дея хабар беради TJournal.
Виктория штатидаги қулупнай қутисида Тринхнинг ДНКси аниқланган. Полиция маълумотларига кўра, гумондор Berrylicious фермасида супервайзер бўлиб ишлаган. Тринхнинг адвокати таъкидлашича, қулупнайларни қадоқлаш аёлнинг вазифасига кирмаган.
Аёлга маҳсулотларга қасддан зиён етказиш билан боғлиқ етти банд бўйича айблов қўйилган, зеро воқеа иқтисодий йўқотишларни келтириб чиқарган. Гумонланувчига 10 йилгача қамоқ жазоси белгиланаши мумкин. Тергов иши ҳозирча якунланмаган.
Судда қайд этилишича, Тринх тахминан иш жойидаги вазиятга қасддан ва жаҳл қилиб шундай йўл тутган, дейилади The Guardian нашрида. CNN маълумотларига кўра, аёл ҳамкасблари томонидан ёмон муносабатдан шикоят қилган ва қасос эҳтимоли ҳақида гапирган.
Австралия полицияси ҳисоб-китобларига кўра, полицияга қулупнайларда игна топилиши билан боғлиқ 230 шикоят келиб тушган. Воқеалар 69 та маҳаллий брендни ҳам ўз ичига олди.
Бундан аввал сентябрь ойидан австралияликлар қулупнайлар ичига яширинган тикув машинаси игналарини топа бошлагани ҳақида хабар берилган эди.
Изоҳ (0)