Қашқадарёнинг Қарши туманидаги 63-мактабда ўқиган 8-синф ўқувчиси 2 ноябрь куни ўзини осиб қўйган эди. Дастлабки хабарларда у мактабдаги камситишларга чидолмай, шу ишга қўл ургани айтилганди; «Turon 24» томонидан олиб борилан суриштирувда эса бу фожиада ўқувчининг отаси мактабни, мактаб вакиллари эса отани айблаётгани ҳақида сўз боради. Агентлик суриштирувида, шунингдек, ушбу ҳолат юзасидан туман прокуратураси амалга оширган баъзи хатти-ҳаракатларга ҳам тўхталиб ўтилган.
Марҳум ўқувчининг синфига у 5—6-синфда ўқиётганида раҳбарлик қилган биология фани ўқитувчиси Дилобар Бобожонова ва 8-синфнинг собиқ синф раҳбари Зилола Аҳмедованинг айтишича, ушбу кўнгилсиз воқеа содир бўлгандан кейин мактаб ўқитувчилари ва раҳбариятини, маҳалла инспектори ва имомини — жами 12 кишини 7 ноябрга ўтар кечаси, соат 24:00 атрофида Қарши туман прокуратурасига чақиртиришган ва уларни тонг соат 5:00 га қадар идорада ушлаб туришган.
Мавзуга доир: Қашқадарёда 8-синф ўқувчисини ўзини осиб қўйган эди. Бу воқеада ўқувчининг отаси мактабни, мактаб эса отани айблаяпти
Ўқитувчи Дилобар Бобожонованинг сўзлари: «Прокуратурада мендан 10 сентябрь куни ўқувчига нимага паст баҳо қўйганимни сўрашганида, шуни асослаб бераётган эдим, туман прокурори мени ҳам: «Америкаданмисан?!», дея ҳақорат қилди. Туман прокурори мактаб директорини чақириб, ҳозироқ менга ҳайфсан бериши кераклигини, ойлигимдан 30 фоиз ушлаб қолиши лозимлигини айтди. Ваҳоланки, ўша пайт соат тонгги 4:00 эди. Ўқувчининг билими талабга жавоб бермагани учун паст баҳо қўйганим менинг айбимми?».
Маълумот учун, Қарши туманидаги ушбу ҳодиса юзасидан Жиноят кодексининг 103-моддаси 2-қисми «б» банди («вояга етмаган шахсни ўзини ўзи ўлдириш даражасига етказиш») билан жиноят иши қўзғатилган (айбдор деб топилган шахс 7 йилдан 10 йилгача озодликдан маҳрум этилади).
Изоҳ (0)