Бугун, 10 ноябрь куни Ўзбекистоннинг биринчи мудофаа вазири, истеъфодаги генерал-полковник Рустам Аҳмедов 75 ёшни қаршилади. Юбилей муносабати билан Мудофаа вазирлиги марказий аппаратида тантанали маросим бўлиб ўтди. Бу ҳақда вазирликм матбуот хизмати хабар берди.
Байрам тадбирида Ўзбекистон Президенти томонидан йўлланган табрик мактубини Ўзбекистон Президенти ҳузуридаги Хавфсизлик кенгаши котиби Виктор Маҳмудов ўқиб эшиттирди.
Шунингдек, истеъфодаги генерал-полковник Рустам Аҳмедов Ўзбекистонда яшаётган барча миллат ва элатлар вакиллари ўртасида дўстлик, ўзаро ҳамжиҳатлик ва тотувликни мустаҳкамлаш ишида эришган катта ютуқлари, Ўзбекистон халқининг бошқа мамлакатлар халқлари билан дўстлик ва ҳар тарафлама ҳамкорлигини ривожлантирганлиги учун Ўзбекистон Президентининг Фармонига биноан «Дўстлик» ордени билан мукофотланди.
Тантанали маросимда МДҲга аъзо мамлакатлардан вакиллар, жумладан, Россиядан истеъфодаги генерал-лейтенант Геннадий Борисов, Қирғизистондан истеъфодаги генерал-майор Рисбек Мирзаматов, полковник Жанибек Капаров ҳамда полковник Эркин Османов иштирок этиб, юбилей эгасини қутлуғ 75 ёш билан муборакбод этди.
«Бугунги байрам учун барчага чуқур миннатдорчилигимни билдираман. Ёшларнинг, жумладан, ҳарбийларнинг маънавий салоҳиятини ошириш, уларга замон талабларига мос билим ва кўникмаларни бериш, биз каби истеъфодаги ҳарбийларга Ватанимиз манфаатлари учун яна хизмат қилиш имкониятини яратиб бераётган муҳтарам Президентимизга раҳмат айтиб қоламан. Бугун менга топширилган «Дўстлик» ордени биз, фахрийларга берилаётган юксак эътиборнинг намунасидир. Мен бундан жуда ҳам ҳурсандман», — дея ўз миннатдорчилигини билдирди Рустам Аҳмедов.
Ана шундай байрам тадбири Қуролли Кучлар давлат музейида ҳам ўтказилди.
Рустам Аҳмедов 1943 йилда Фарғона вилоятининг Боғдод туманида туғилган. Қўқон шаҳридаги Қишлоқ хўжалигини механизациялаштириш ва электрификациялаш техникумини тамомлаган. 1962—1965 йиллар давомида Тошкент олий танк қўмондонлик билим юртида таҳсил олган.
Хизмат фаолияти давомида Ўзбекистон Мудофаа ишлари бўйича вазир — миллий гвардия қўмондони (1991 йил), Ўзбекистон мудофаа вазири (1992—1997 йй.), Ўзбекистон Фавқулодда вазиятлар вазири (1997—1998 йй.) лавозимларида хизмат қилган.
2018 йилнинг январь ойида Ўзбекистон Президенти Шавкат Мирзиёевнинг фармонига асосан, мудофаа вазирининг маслаҳатчиси этиб тайинланган ва ҳозирги кунда ушбу лавозимда фаолият кўрсатмоқда.
Изоҳ (0)