Ўзбекистон автомобилларни арзон нархда экспорт қилиш бўйича кўп йиллик тажрибага чек қўйди

Ўзбекистон автомобилларни арзон нархда экспорт қилиш бўйича кўп йиллик тажрибага чек қўйди, деб ёзади Spot.

Май ойида Россияда Ravon автомобиллари етишмовчилиги кузатилди. Бунинг сабаби эса нархлар ва бизнес моделлардаги ўзгариш эканлиги маълум бўлди.

Июнь ойи охирида Ўзбекистон Президенти «Ўзавтосаноат»ни танқид қилди. Хусусан, тизимнинг турли даражадаги раҳбариятида коррупция, порахўрлик ҳолатлари юзага келгани, автомобиллар хорижий мамлакатларга таннархидан арзон нархда экспорт қилинаётгани ҳам айтиб ўтилди.

Ўша ойда ўтказилган мониторинг Россияда энг арзон хорижий автомобиль Ravon R2 бўлиб, унинг бошланғич нархи 439 минг рубль (6,9 минг доллар) эканлигини кўрсатди. Ундан кейинги ўринни эса Ravon Nexia эгаллади. Унинг бошланғич нархи эса 449 минг рублни ( 7,1 минг доллар) ташкил этди.

Август ойида GM Uzbekistan автомобилларининг савдоси нафақат Ўзбекистон, балки хорижда ҳам тўхтатиб қўйилди. Шу ойнинг охиридаёқ сотув жараёни янги нархлар билан (Нархлар алоҳида автомобиль моделлари учун ўртача 7,7 фоизга қимматлашди) қайта тикланди.

Хорижий мамлакатларда Ўзбекистонда ишлаб чиқарилган автомобиллар савдоси қайта тикланиши кутилган эди. Бироқ бундай бўлмади. «Ўзавтосаноат» раиси Шавкат Умурзоқов ўшанда экспорт фойда келтирмаётгани учун тўхтатилганини айтган эди.

Россия ва Қозоғистонда Ravon автомобиллари тўрт ойдан кўпроқ сотилмади. Октябрь ойининг охирида автомобиллар яна экспорт қилина бошланди, ўшанда уларнинг нархи ошиши ҳақида хабарлар тарқалди.

Ноябрь ойининг охирида бу ўз тасдиғини топди. Агар октябрда Қозоғистондаги Ravon сайтида нархлар ҳақида маълумот жойлаштирилмаган бўлса, ноябрнинг илк кунларида Nexia Ravon 3 4,5 миллион тенге (12 минг доллар атрофида) эвазига сотувга чиқарилди.

Таққослаш учун, май ойида савдо тўхтагунига қадар ушбу моделнинг нархи 2,8 миллион тенге (7,5 минг доллар) бўлган.

Нархдаги деярли 5 минг долларлик фарқ ижтимоий тармоқлар фойдаланувчиларини ғазаблантирди.

Хусусан, Қозоғистон ва Россия аҳолиси Ravon’нинг устунликларидан бири унинг арзонлиги бўлганини, эндиликда ушбу устунлик йўқлигини қайд этди. Маъмурият эса бу компания сиёсати эканлигини маълум қилди.

Ижтимоий тармоқлар фойдаланувчилари Ўзбекистон автомобиллари арзон бўлган даврлар ўтиб кетгани ва у даврнинг энди қайтмаслигини ёзиб қолдирган.