Тошкентда Осиё футбол конфедерациясининг халқаро «А» сертификати учун бўлиб ўтаётган мураббийлик ўқув курсларига футбол бўйича Ўзбекистон миллий терма жамоаси бош мураббийи Эктор Купер ташриф буюрди, деб хабар беради ЎФА матбуот хизмати.
«А» лицензияси учун таҳсил олаётган мураббийлар 8 ноябрь санасида Ўзбекистон миллий терма жамоаси бош мураббийи Эктор Купер билан учрашди. Таъкидланишича, аргентиналик мутахассис учрашув давомида мураббийларни қизиқтирган саволларга жавоб бериб ўтган. Шунингдек, мураббийлик соҳаси бўйича турли масалалар бўйича фикр алмашилган.
Қайд этилишича, мазкур ўқув курсида 24 нафар мураббий иштирок этмоқда. Ўқув курсини ФИФА ва ОФК инструктори Ислом Аҳмедов олиб бормоқда. Унга координатор Ойбек Давлетмуратов ёрдам беряпти. Ушбу курсларни муваффақиятли тамомлаганлар 2019 йилдан бошлаб Про-лигада бош мураббий, Суперлигада ёрдамчи мураббий, терма жамоаларда эса мураббий бўлиб ишлаш ҳуқуқини қўлга киритади. Шундан сўнг мураббийлар 2 йил давомида мураббий сифатида фаолият юритиб, кейин «Про» лицензияси учун ўқишни давом эттириши мумкин бўлади.
Ўқув курсларида Темур Кападзе, Виктор Карпенко, Асрор Алиқулов, Неъматулло Қуттибоев, Хайрулла Каримов, Абдумажид Тоиров каби футболчилар иштирок этмоқда. Шунингдек, «А» лицензиясини қўлга киритиб бўлган мутахассислар — Улуғбек Бақоев, Жасур Абдураимов ва Жафар Ирисметовлар эркин тингловчи сифатида курсларда қатнашмоқда.
Изоҳ (0)