Азиз Абдуҳакимов: давлатнинг авиабозордаги иштироки тубдан қайта кўриб чиқилади

Ўзбекистонда давлат назорати тизимини тубдан қайта кўриб чиқиш, йўловчи авиаташувлари бозорининг институционал асосларини такомиллаштириш, функцияларни давлат регулятори, авиаташувчи ва аэропортларни бошқариш бўйича операторга бўлиб чиқиш кутилмоқда. Бу ҳақда Бош вазир ўринбосари Азиз Абдуҳакимов журналистларга айтиб ўтди, деб ёзади Spot.

Президентнинг «Туризм соҳасини тезкор ривожлантириш масалаларини ўрганиш бўйича гуруҳ ташкил қилиш тўғрисида»ги фармонида соҳани янада ривожлантириш йўллари белгилаб қўйилган.

Азиз Абдуҳакимовнинг сўзларига кўра, аввало, транспорт ва йўл ёқаси инфратузилмасини, автомобиль йўллари, йўловчиларни темир йўл ва автомобиль транспортида ташиш тизимларини ривожлантириш муаммоларини ҳал қилиш керак.

Ҳаво қатновига келсак, у ерда миллий авиаташувчи авиация паркидан фойдаланиш самарадорлигини ошириш ҳамда мунтазам ва чартер парвозлари географиясини кенгайтириш учун чет эл авиакомпанияларини жалб этиш режалари ҳам бор.

Аэропортларда хизмат кўрсатиш даражасини ошириш учун уларнинг алоҳида тузилмага ажратилиши, инвесторларга танлов асосида ташқи бошқарилишга берилиши режалаштирилмоқда.

Айни вақтда Ўзбекистон авиабозорида деярли барча нарса учун битта давлат компанияси — «Ўзбекистон ҳаво йўллари» жавоб беради (унинг улуши — 75 фоиз). Жаҳон банки гуруҳи ҳукуматга авиация секторини ислоҳ қилиш борасида консультация беради.