Тошкентда «Вино санъати» фестивали ўтказилади

Жорий йил 21—23 ноябрь кунлари Тошкентда «Вино санъати» фестивали ўтказилади. Бу ҳақда «Turon 24» хабар бермоқда.

Фестивальга Болгария, Венгрия, Грузия, Италия, Молдова, Россия, Франция, Япония каби давлатлардан экспертлар, мутахассислар келиши кутилмоқда. Улар орасида Santuccio Sommelier ассоциацияси президенти Леонардо Комуччи, Токио сомельер мактаби вакили Орзугул Бобохўжаева, Россиянинг Шампан энологияси институти вакили Маргарита Панкратова бор.

Ташкилотчилар «Вино санъати» уч хил — илмий, маданий ва кўнгилочар йўналишларни ўз ичига оладиган ноодатий фестиваль бўлишини айтмоқда.

Фестиваль доирасида «Вино ва узумчилик саноатида инновацион технологиялар», «Шарқ узумлари» номли халқаро илмий-амалий анжуманлар ўтказилади.

Шунингдек, маданий-кўнгилочар дастурлар, вино санъати бўйича маҳорат дарслари, маҳаллий гастрономик маҳсулотлар ва миллий ҳунармандчилик намуналари кўргазмаси ташкил этилади.