Қорақалпоғистоннинг Устюрт текислигида жойлашган «Сайгачий» қўриқхонасига тақиқ белгилари ўрнатилди. Энди бегоналар ушбу белгилар ўрнатилган ҳудудга кириши қатъиян ман қилинади, дея хабар беради ЎзА.
— Ушбу белгилар сайғоқларни сақлаб қолиш, асраб-авайлаш, уларнинг бош сонини кўпайтириш, шунингдек, ўсимлик ва ҳайвонот дунёсини муҳофаза қилиш мақсадида ўрнатилди, — дейди «Сайгачий» қўриқхонаси инспектори Байрам Утеулиев.
Мазкур қўриқхона умумий давлат аҳамиятидаги қўриқланадиган табиий ҳудуд саналади. 628 минг 300 гектар ер майдонига эга қўриқхонанинг алоҳида қўриқланадиган майдони 219 минг 800 гектарни ташкил қилади. Майдон 5 та — Белеули, Чуруқ, Алманбет, Дувана ва Жийдели ҳудудларига бўлинган.
Қўриқхона ҳудудида ташкилотнинг иккита базаси қурилган. Бу базаларда ўсимлик ва ҳайвонот оламини муҳофаза қилиш мақсадида рейд ишлари олиб борилади.
Қўриқхона ҳудудида маҳаллий шароитга мослаштириш учун ўсимлик ва ҳайвонлар турларини ҳамда кенжа турларини жойлаштириш, ўсимликлар ва ландшафт қопламаси, гидрогеологик режимни ўзгартириш ва ҳар қандай бошқа фаолият юритиш тақиқланади. Шунингдек, қўриқхона ерлари ва бошқа табиий объэктларинга бошқа юридик ва жисмоний шахслар эгалик қилиши, фойдаланиши ва ижарага бериш ҳам ман қилинади.
Бу ҳудудларда фақат илмий-тадқиқот фаолиятини юритиш, биологик хилма-хиллик мониторингини олиб бориш, мажмуа буюртма қўриқхонаси ходимлари ва илмий ходимларнинг яшаши учун бино ва иншоотлар қуриш, қўриқхонанинг табиат музейлари, жумладан, очиқ осмон остидаги экспозицияларни жойлаштириш ишларига рухсат берилади.
Маълумот учун, «Сайгачий» қўриқхонаси 2016 йилда Қорақалпоғистоннинг Мўйноқ ва Қўнғирот туманлари ҳудудида жойлашган «Сайгачий» буюртмахонаси негизида табиатни муҳофаза қилиш муассасаси шаклида ташкил этилган. Унинг мақсади алоҳида экологик қимматга эга бўлган табиий объэктлар ва мажмуаларни ўз ҳудудида асл табиий ҳолатда сақлашдан иборат. Ташкилотда 13 та ходим фаолият юритмоқда.
Изоҳ (0)