Наманган вилояти давлат солиқ бошқармасининг солиқ соҳасида ҳуқуқбузарликлар профилактикаси бўлимлари томонидан мунтазам ўтказилаётган назорат тадбирлари савдо, ишлаб чиқариш ва бошқа тадбиркорлик йўналишларида қонунбузарликларнинг олдини олишда муҳим аҳамият касб этмоқда, деб ёзади ЎзА.
Вилоят давлат солиқ бошқармаси жамоатчилик билан алоқалар ва ҳуқуқий ахборот шўъбасидан олинган маълумотга кўра, жорий йилнинг ўтган даврида ўтказилган назорат тадбирларида ноқонуний савдо ва маҳсулотлар ишлаб чиқаришга оид 215 та қонун бузилиш ҳолати аниқланиб, 1 миллиард 230 миллион сўмлик ноқонуний товар моддий бойликлари вақтинча сақловга олинган.
Жумладан, Наманган шаҳридаги «Чорсу универсал деҳқон бозори» ҳудудида ўтказилган назорат тадбирларида 1996 йилда туғилган фуқаро А.Худойбердиев умумий қиймати 14,3 миллион сўмлик бижутерия маҳсулотларини ҳеч қандай ҳужжатсиз сотаётганлиги маълум бўлди.
Худди шундай Наманган шаҳрида яшовчи, 1989 йилда туғилган И.Тожиддинов тегишли ҳужжатларсиз 12,5 миллион сўмлик халқ истеъмол моллари савдоси билан шуғулланаётгани аниқланган.
Шунингдек, «Сардоба бозори» МЧЖ ҳудудида 16,1 миллион сўмлик плёнка маҳсулотларини ҳужжатларсиз сотаётган йигирма олти ёшли Б.Дадабоев ҳам тадбиркорлик фаолияти учун яратилган имконият ва имтиёзлардан тўғри фойдаланиш ўрнига мавжуд қонун-қоидаларни писанд қилмаслик қанчалик қимматга тушиши мумкинлигига ўз «тажрибасида» ишонч ҳосил қиладиган бўлди.
Ҳуқуқбузарларга нисбатан тегишли тартибда чоралар кўрилиб, ноқонуний товарлар олиб қўйилди.
Изоҳ (0)