Тошкентда Ўзбекистон нефть ва газ саноатида GTL лойиҳаси бўйича кредиторлар йиғилиши бўлиб ўтди. Бу ҳақда «Дарё»га «Ўзбекнефтгаз» АЖ матбуот хизмати маълум қилди.
Унда иштирок этиш учун Корея экспорт-импорт банки, Корея савдо ва суғурта корпорацияси, «Газпром» акциядорлик жамияти, «Roсэксимбанк» акциядорлик жамияти ҳамда Экспорт кредитлари ва инвестицияларни суғурталаш бўйича Россия агентлиги вакилларидан иборат кредиторлар делегацияси Тошкентга келди.
«Шўртан газ-кимё мажмуасининг тозаланган метани асосида синтетик суюқ ёқилғини ишлаб чиқариш» (УзGTL) лойиҳаси доирасида Ўзбекистоннинг Қашқадарё вилоятида энг замонавий стандарларга жавоб берадиган завод қурилади. GTL ёки «газдан суюқлик» технологиясига асосланган бу каби юқори технологияли ишлаб чиқаришлар дунё бўйлаб саноқли — Жанубий Африка Республикаси, Малайзия ва Қатарда.
Завод йилига 1,5 миллион тоннадан ортиқ ЕVRО 5 стандартига мос юқори сифатли синтетик суюқ ёқилғини ишлаб чиқаради.
Йиғилишни «Ўзбекнефтгаз» акциядорлик жамияти бошқарув раисининг биринчи ўринбосари Улуғбек Сайидов очиб берди. У кореялик ҳамкорларга турли масалаларни мувофиқлаштириш ва ҳал қилишда профессионал ёндашувлари учун миннатдорчилик билдирди, лойиҳани ўз вақтида амалга ошириш муҳимлигини англаб молиялаштириш жараёнини тезлаштиришга тайёр турган россиялик шерикларнинг ҳиссасини алоҳида таъкидлади ҳамда мазкур лойиҳани молиялаштиришга биринчи бора киришаётган хитойлик ҳамкорларга ҳам ташаккур билдирди.
«Сизга мамнуният билан маълум қиламизки, ҳукумат GTL лойиҳасининг якуний молиялаштириш тузилмасини маъқуллади ва жорий йилнинг ноябрь ойи охирига қадар барча молиялаштириш масалаларини мувофиқлаштиришни якунлаш ва кредитларни жалб қилишни бошлаш вазифасини қўйди. Умид қиламанки, мазкур учрашув иштирокчиларга бу вазифани бажариш имконини беради», дея сўзини якунлади «Ўзбекнефтгаз» акциядорлик жамияти бошқарув раисининг биринчи ўринбосари.
Йиғилишда «Uzbekistan GTL» МЧЖ билан кредиторлар вакиллари ҳамда лойиҳа бўйича маслаҳатчилар ўртасида лойиҳани молиялаштиришнинг умумий шартлари тўғрисидаги келишув билан боғлиқ масалалар муҳокама этилди.
Шунингдек, йиғилиш доирасида кредиторлар делегацияси аъзолари Қашқадарё вилоятидаги UzGTL қурилиш майдонида жойлашган объектларида бўлади ва янги завод қурилиши жараёни билан танишди.
Лойиҳани амалга ошириш табиий газни чуқур қайта ишлаш қувватини кенгайтириш, углеводород импортини қисқартириш, юқори сифатли ва экологик тоза ёқилғига ички эҳтиёжни қоплаш ҳамда бозорни маҳаллий хом ашёдан ишлаб чиқарилган стратегик маҳсулотлар билан таъминлаш имконини беради.
Ҳисоб-китобларга кўра, лойиҳани амалга ошириш нефть маҳсулотларининг йилига 1,5 миллион тоннагача импорти ўрнини босиш имконини беради.
Синтетик суюқ ёқилғини ишлаб чиқариш учун мўлжалланган заводнинг хом ашё базаси Шўртан газ-кимё мажмуасининг тозаланган метанидир. Унинг ҳажми йилига 3,6 миллиард куб метрни ташкил этади.
Изоҳ (0)