Ўзбекистон ёш олимлар кенгашининг «Республика ёш олимларининг инновацион лойиҳалари» грант танлови бўлиб ўтмоқда. Унда иштирокчилар лойиҳаларининг тақдимоти ўтказилади. Бу ҳақда «Дарё»га Ёшлар медиа маркази маълум қилди.
Олий таълим ва илмий тадқиқот муассасаларининг бакалавр, магистр, таянч докторант ва мустақил изланувчиларининг илмий-назарий ҳамда илмий- амалий тадқиқотларини натижадорлигини ошириш, ишлаб чиқаришга самарали жорий этиш, уларнинг илм-фан ютуқларига бўлган қизиқишларини қўллаб-қуватлашга қаратилган мазкур танлов аниқ фанлар, ижтимоий-гуманитар фанлар ва табиий фанлар йўналишлари бўйича олиб борилмоқда.
—Танловга 200 нафар ҳужжат топширилган бўлса, уларнинг 100 таси саралаб олинди. Бугун танловнинг ижтимоий фанлар йўналиши бўйича лойиҳалар тақдимоти баҳоланди. Бу йўналишдаги лойиҳалар орасида муваффақиятлиларини ҳам кўрдик. Танловга халқаро даражадаги инновацион лойиҳалар ҳам тақдим этилган. Иштирокчилар орасидан 3 нафар ғолиб саралаб олинди, – дейди Ёш олимлар кенгаши директори Камолиддин Мирзааҳмедов.
Танловда ғолиб бўлмаган лойиҳалар ҳам эътибордан четда қолмайди. Уларни янада такомиллаштириш учун илмий-техник лабораторияларга йўналтирилади. У ерда лойиҳа шакллантирилади ва Инновацион ривожланиш вазирлигининг халқаро танловларига йўналтирилади.
Маълумот учун, танловнинг 3 нафар лойиҳа ғолибига 10 миллион сўмдан грант ажратилади.
Изоҳ (0)