Адлия вазирлиги Халқаро хамкорлик бўйича Германия жамияти (GIZ) билан ҳамкорликда ОАВ ходимлари учун «Маъмурий тартиб-таомиллар тўғрисида»ги қонунга бағишланган тренинг ўтказди. Бу ҳақда «Дарё»га вазирлик жамоатчилик билан алоқалар бўлими маълум қилди.
Чет эллик эксперт сифатида судья Ш. Гроскурт (Германия) таклиф қилинди. Бундан ташқари, тренингда маҳаллий экспертлар – Тошкент давлат юридик университети ва Президент ҳузуридаги Давлат бошқарув академияси ўқитувчилари Баҳром Умаров ва Жўрабек Неъматов иштирок этди.
Тренинг давомида маъмурий тартиб-таомилларининг асослари, принциплари, маъмурий тартиб-таомиллардаги иштирок, маъмурий тартиб-таомилларнинг амалга оширилиши, маъмурий акт, маъмурий акт устидан шикоят қилиш тартиби ва бошқа асосий ҳолатларга эътибор қаратилди.
Таъкидлаш жоизки, ўз вақтида «Маъмурий тартиб-таомиллар тўғрисида»ги Қонун лойиҳаси Адлия вазирлиги томонидан ишлаб чиқилган эди. Мазкур Қонун маъмурий органларнинг манфаатдор шахсларга нисбатан маъмурий-ҳуқуқий фаолиятига, шу жумладан лицензия, рухсат бериш, рўйхатдан ўтказиш тартиб-таомилларига, давлат хизматларини кўрсатиш билан боғлиқ бошқа тартиб-таомилларга, шунингдек қонун ҳужжатларига мувофиқ бошқа маъмурий-ҳуқуқий фаолиятга нисбатан татбиқ этилади.
Қонун норматив-ҳуқуқий ҳужжатларни тайёрлаш ва қабул қилиш, солиқларва бошқа мажбурий тўловларни ундириш, давлат хизматини ўташ, референдумлар, сайловлар ўтказиш, мудофаа, жамоат хавфсизлиги ва ҳуқуқ-тартибот соҳасида, шунингдек тезкор-қидирув фаолияти, суриштирув, дастлабки тергов, жиноий мажбурлов чораларини қўллаш билан боғлиқ бўлган бошқа фаолият, суд ишини юритиш, маъмурий ҳуқуқбузарликлар тўғрисидаги ишларни юритиш соҳасида юзага келадиган муносабатларга нисбатан татбиқ этилмайди.
Қонунга мувофиқ, маъмурий тартиб-таомил бу маъмурий органларнинг маъмурий-ҳуқуқий фаолиятини тартибга солувчи процессуал қоидалар ҳисобланади.
Тренинглар республика бўйича ўтказилиши режалаштирилган.
Изоҳ (0)