Ўзбекистонда космик фаолиятни ривожлантириш тўғрисидаги фармон лойиҳаси жамоатчилик муҳокамаси учун эълон қилинди, деб ёзади Turon 24 АА.
Қайд этилишича, Ўзбекистонда космик тадқиқотлар ва технологияларни ривожлантириш учун зарур бўлган тажриба, интеллектуал ресурслар ва базавий космик инфратузилмалар мавжуд.
Вазирлар Маҳкамаси ҳузурида ташкил этилиши режалаштирилаётган Космик тадқиқотлар ва технологиялар агентлиги («Ўзбеккосмос») соҳани тартибга солади. У космик соҳани ривожлантириш ва ундан фойдаланиш соҳасида ягона давлат сиёсати ва стратегик йўналишларни ишлаб чиқиш ва амалга оширишга масъул давлат бошқаруви органи бўлади.
«Ўзбеккосмос» агентлиги ҳузурида Илмий-техник ва эксперт кенгаши ташкил этиш кўзда тутилган. Унинг таркибидан Ахборот технологиялари ва коммуникацияларини ривожлантириш, Мудофаа, Инновацион ривожланиш вазирликлари, Ер ресурслари, геодезия, картография ва давлат кадастри бўйича, Геология ва минерал ресурслар бўйича давлат қўмиталари ҳамда Фанлар академиясидан вакиллар ўрин олади.
2019 йил 1 февралга қадар «Космик фаолият тўғрисида»ги қонун лойиҳаси, 2018 йил 20 декабрга қадар Космик соҳани 2019 – 2029 йилларда ривожлантириш концепцияси лойиҳаси, 2019 йил 1 ноябргача эса Космик соҳани 2019 – 2029 йилларда ривожлантириш бўйича давлат дастури лойиҳаси тайёрланади.
2019 йил 1 сентябрга қадар Тошкент давлат техника университети, Ўзбекистон миллий университети ва Тошкент давлат ахборот технологиялари университетида «Амалий космик технологиялар» кафедралари ташкил этилади.