Бугун, 29 октябрь санасида Ўзбекистон Савдо-саноат палатасида Хитойнинг Хубей провинцияси тижорат бўйича департаменти директорининг ўринбосари Юан Ясзе раҳбарлигидаги ишбилармон доиралари билан учрашув бўлиб ўтди, деб ёзади ЎзА.
«Бизнес – бизнес учун» форматида ўтказилган учрашувда Хитойнинг автомобиль шосселари, темир йўл линиялари, кўприклар, ишлаб чиқариш мажмуалари учун кўп қаватли биноларни барпо этишга ихтисослашган қурилиш соҳаси ишбилармонлари иштирок этди.
Учрашувда хитойлик меҳмонлар Ўзбекистоннинг иқтисодий салоҳияти ва имкониятлари, тадбиркорликка кенг йўл очиш йўлидаги шиддатли ислоҳотлар билан таништирилди. Тадбирдан кўзланган асосий мақсад ҳам хитойлик ишбилармон доираларни Ўзбекистоннинг турли ҳудудларидаги инвестицион лойиҳаларга кенгроқ жалб этиш, қурилиш-монтаж ишлари ва инфратузилма объектларини барпо этишга ихтисослашган ўзбекистонлик ҳамкорлар билан ишбилармонлик муносабатларини ўрнатишга шароитлар яратишдан иборат эди, дейилади хабарда.
Бизнес учрашув якунида икки мамлакат ўртасидаги савдо-иқтисодий ва инвестицион ҳамкорликни янада ривожлантиришга оид ҳамкорлик меморандуми имзоланди.
Изоҳ (0)