Европа Кенгашининг Венеция комиссияси таклифига биноан Ўзбекистон Республикаси Марказий сайлов комиссияси Раиси М. Абдусаломов, Президент администрациясининг сектор мудири У. Шерматовлардан иборат таркибдаги мамлакатимиз делегацияси жорий йилнинг 19-20 октябрь кунлари Италиянинг Венеция шаҳрида бўлиб ўтган Ҳуқуқ орқали демократия учун Европа Комиссияси (Венеция комиссияси) нинг 116-ялпи йиғилишида иштирок этди. Бу ҳақда Марказий сайлов комиссияси матбуот хизмати хабар берди.
Венеция комиссияси ўз тарихининг 25 йилдан зиёдроқ даврида ҳуқуқ устуворлигини таъминлаш соҳасида халқаро ҳамжамият саъй-ҳаракатларини бирлаштирувчи марказга айланди. Ҳозирги кунда у Европада хавфсизлик ва ҳамкорлик ташкилотининг Демократик институтлар ва инсон ҳуқуқлари бўйича бюроси билан хусусан, сайлов ҳуқуқи соҳасида муваффақиятли ҳамкорлик қилмоқда. Ўзбекистон Венеция комиссияси ва ЕХҲТнинг Демократик институтлар ва инсон ҳуқуқлари бўйича бюроси билан ҳамкорликка алоҳида аҳамият бериб келмоқда.
116-ялпи йиғилиш ишида Венеция комиссияси Президенти ва аъзолари, Европа Кенгаши таъсис органларининг раҳбарлари, Комиссия томонидан ҳуқуқий ҳужжатлари бўйича хулосалар қабул қилинган Албания, Қозоғистон, Молдова Республикаси, Марокаш, Руминия, Тунис каби бир қатор мамлакатларнинг ҳукумат вакиллари, вазирлар ва масъул ходимлари, шунингдек ЕХҲТ ДИИҲБ экспертлари иштирок этди.
Венеция комиссиясининг ялпи йиғилиши давомида М.Абдусаломов Ўзбекистон Республикаси Сайлов кодекси лойиҳасини ишлаб чиқиш жараёни тўғрисида маълумот берди. Хусусан, Президентимиз Шавкат Мирзиёев томонидан 2017 йил 22 декабрдаги Олий Мажлисга Мурожаатномасида Ўзбекистон Республикасининг Сайлов кодексини ишлаб чиқиш ва қабул қилиш вазифаси қўйилганлиги, шунингдек 2017—2021 йилларда Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегиясини жорий йилда амалга оширишга оид давлат дастури ижросини таъминлаш юзасидан сайлов қонунчилигини такомиллаштириш ва унификациялаш мақсадида ушбу лойиҳа тайёрланганлиги таъкидланди.