Американинг Defence Blog номли ҳарбий нашри ва Нидерландиянинг авиация ҳақидаги Scramble журнали, тахминларга кўра, Россия армияси учун ишлаб чиқилаётган янги вертолёт модели суратларини эълон қилди. Бу ҳақда Meduza хабар бермоқда.
Вертолёт қанотлар ва борт тагига яшириладиган шасси билан таъминланади; у соатига 700 километргача тезлашиши мумкинлиги айтилмоқда.
Янги вертолёт модели «Камов» конструкторлик бюроси томонидан ишлаб чиқилмоқда; унинг тақдимотини бюро директори Сергей Михеев ўтказган, дея хабар бермоқда Defence Blog.
Вертолёт ишланмаларнинг қайси босқичида тургани номаълум, шунингдек, тақдимот қачон ва қаерда ўтказилгани ҳам маълум қилинмаяпти. Defence Blog’нинг таъкидлашича, ушбу суратлар Россия ижтимоий тармоқларидан топилган.
2018 йил февралида Россия мудофаа вазири ўринбосари Юрий Борисов россиялик ҳарбийлар крейсерлик тезлигини соатига 400 километргача ошира оладиган вертолётни қабул қилиб олишга умид қилаётганини маълум қилганди. Унинг сўзларига кўра, бундай вертолёт беш—етти йил ичида ишлаб чиқилиши мумкин.
Изоҳ (0)