Тошкент вилояти Чирчиқ шаҳри, Навоий ва Сирдарё вилоятлари ҳудудида барча хўжалик юритувчи субъектлар томонидан электрон ҳисобварақ фактураларини мажбурий тартибда расмийлаштиришни жорий этиш бўйича тажриба ўтказилмоқда. Бу ҳақда ЎзА хабар берди.
Навоий вилояти давлат солиқ бошқармасида ўтказилаётган тажриба-синов жараёнлари мазмун-моҳиятига бағишланган амалий семинар ташкил этилди.
Солиқ тизими мутахассислари, вилоятдаги корхона ва ташкилотларнинг бухгалтерия соҳаси вакиллари иштирокида ўтган семинарда интернет тармоғида яратилган E-factura тизимининг афзалликлари хусусида тушунча берилди. Эксперимент ўтказиш даврида хўжалик юритувчи субъектларга ҳисобварақ фактуралари, товар-транспорт юкхатлари ва товар-моддий бойликларни олиш учун ишончномаларни электрон шаклда тақдим этиш билан бир вақтда қоғоз шаклида тузиш ҳуқуқи берилади.
– Янги тизим ривожланган мамлакатлар тажрибаси асосида амалиётга жорий этилмоқда, – дейди Давлат солиқ қўмитаси ҳузуридаги Малака ошириш маркази катта ўқитувчиси Ф.Раҳимов. – Эндиликда ишлаб чиқарувчи ва хизмат кўрсатаётган корхоналар учун www.soliq.uz сайтида E-factura хизмати ҳам жорий этилди. Ҳисобварақ фактуралари мазкур тизим имкониятларидан фойдаланиб шакллантирилгач, у электрон рақамли имзо билан тасдиқланади. Ушбу ҳужжатда, шунингдек, автоматик тарзда акс этадиган махсус QR-код унинг ягона ва ҳақиқий эканини кўрсатиб туради.
Изоҳ (0)