Жорий йилнинг 18—20 октябрь кунлари Алишер Навоий номидаги Тошкент давлат ўзбек тили ва адабиёти университетида анъанавий «Turklang—2018: Туркий тилларни компьютерли қайта ишлови» мавзусидаги VI Халқаро конференция бўлиб ўтади. Бу ҳақда университет матбуот хизмати «Дарё»га маълум қилди.
Конференция туркий тилларнинг формал моделлари, компьютер тизими ва терминологиянинг миллий локаллашуви, корпусшунослик, матнни қайта ишловчи илова, нутқ технологияси, машина таржимаси, туркий тилларни ўрганишда интеллект тизимлари ва технологиялари ҳамда туркий тилларнинг лингвистик онтологиялари йўналишларида олиб борилаётган тадқиқотлар бўйича ўтказилади.
Мазкур анжуман 2013 йилда илк бор Қозоғистоннинг Остона шаҳрида ўтказилган бўлиб, шу кунгача Қирғизистон, Туркия ва Татаристон (Россия Федерацияси) унга мезбонлик қилган. Анжуманда дунёнинг 20 дан ортиқ мамлакатидан 100 га яқин турколог, тилшунос ва компьютер лингвистикаси билан шуғулланувчи дастурчилар иштирок этмоқда.
Мазкур йирик халқаро конференция ТошДЎТАУнинг Ахборот ва замонавий педагогик технологиялар кафедрас мудири Саодат Муҳаммедованинг қайд этишича, туркий халқларнинг компьютер лингвистикаси соҳасида бирлашиши давлатларнинг ижтимоий ва иқтисодий жиҳатдан ҳам юксалишига хизмат қилади.
Конференциянинг қисми сифатида доимий ўтказилиб келинаётган «Туркий тилларнинг электрон корпусида Грамматик аннотация тизимларининг унификацияси» бўйича UniTurk семинари ҳам бўлиб ўтади.
Изоҳ (0)