Энди харидор автосалонга автомобили етказилганлиги тўғрисидаги маълумотни GM Uzbekistan сайти орқали билиши мумкин

GM Uzbekistan АЖ харид жараёнлари шаффофлигини таъминлаш мақсадида компаниянинг расмий сайтида «Автосалонга етказилган автомобиллар рўйхати» бўлими орқали мижозларни хабардор қилиш янги хизматини йўлга қўйди. Бу ҳақда компания матбуот хизмати хабар берди.

Энди компаниянинг расмий саҳифасига автомобили автосалонга етказилган харидорлар рўйхати жойлаб борилади. Маълумотлар кунлик тарзда янгиланиб борилади. Рўйхат билан қуйидаги ҳавола орқали танишиш мумкин: http://gmuzbekistan.uz/

Янги хизмат автомобиль харидининг барча босқичида шаффофликни таъминлашга хизмат қилади.

«Турли баҳоналар билан сиздан автомобиль етказиб беришда қўшимча маблағ талаб қилинган ҳолатларда сиз GM Uzbekistan АЖ да ташкил этилган Call-Марказга (+99871) 141-77-77 рақамлари орқали ёҳуд Бош Прокуратуранинг 10-07 ишонч рақамлари орқали мурожаат қилишингиз мумкин», — дейилади хабарда.