Адлия вазирлигига «Сувлойиҳа» ДУКка қарашли Тошкент шаҳри, Юнусобод туманида жойлашган 22-ётоқхонада узоқ йиллардан буён яшаб келаётган 16 та оила аъзоларининг талабидан келиб чиқиб, ушбу ётоқхонани турар жой мақомига ўтказиш масаласи бўйича мурожаат келиб тушди ва у кўриб чиқилди. Бу ҳақда «Дарё»га вазирлик жамоатчилик билан алоқалар бўлими маълум қилди.
Уй-жой кодексининг 82-моддасида уйларни ётоқхоналарга ўтказиш, шунингдек, ётоқхоналарга уйлар мақомини бериш уй-жой фондининг мулкдорлари томонидан маҳаллий давлат ҳокимияти органлари билан келишилган ҳолда амалга оширилиши белгиланган.
Муаммони ҳал этишда Юнусобод туман ҳокимининг 2018 йил 12 июнда қабул қилинган 282-ф-сон алоҳида фармойиши асосида давлат қабул ҳайъати аъзолари томонидан ётоқхонани турар жой мақомига ўтказиш масаласи кўриб чиқилиши таъминланди.
Натижада 20 йилдан буён фуқароларни қийнаб келаётган муаммо ҳал этилди. Юнусобод туман ҳокимининг 2018 йил 12 октябрдаги қарорига асосан тумандаги 22-ётоқхона биноси ётоқхона мақомидан чиқарилиб, уй-жой фонди рўйхатига киритилди.
Изоҳ (0)