Бугунги кунда республика бўйича жами 2147 субъектнинг, шундан 1197 нафари якка тартибдаги тадбиркорлик фаолиятини қайта тиклаганлиги ва 950 нафари давлат рўйхатидан ўтганлиги натижасида 73,1 миллиард сўмлик қатъий белгиланган солиқ ва молиявий жарима бўйича мавжуд қарзи ҳисобдан чиқарилди. Бу ҳақда «Дарё»га Давлат солиқ қўмитаси маълум қилди.
Президентнинг «Тадбиркорлик субъектларининг ҳуқуқлари ва қонуний манфаатларини ҳимоя қилиш тизимини янада такомиллаштириш чора-тадбирлари тўғрисида»ги фармонига мувофиқ, 2018 йил 1 апрелга қадар тадбиркорлик мақомини йўқотган, фаолиятини амалга оширмаётган, фаолиятини вақтинча тўхтатган якка тартибдаги тадбиркорлар 2019 йил 1 январга қадар тадбиркорлик фаолиятини тиклаган ёки давлат рўйхатидан ўтган ҳолларда, қатъий белгиланган солиқ ва молиявий жарима бўйича қарзи ҳисобдан чиқарилиши белгиланган.
Давлат солиқ қўмитаси 2019 йил 1 январь санаси яқинлашаётганлиги боис берилаётган бундай имкониятдан унумли фойдаланган ҳолда фармон талабларига асосан тадбиркорлик фаолиятини тиклаш ёки якка тартибдаги тадбиркор сифатида давлат рўйхатидан ўтишга чақиради.
Изоҳ (0)