Сурхондарё вилоятининг Шеробод туманида қишлоқ хўжалиги техникалари кўргазма-ярмаркаси бўлиб ўтди. Бу ҳақда «Дарё»га вилоят ҳокимлиги матбуот хизмати маълум қилди.
«Ўзагротехсаноатхолдинг» акциядорлик жамияти томонидан ташкил этилган тадбирда Тошкент агрегат, Чирчиқ қишлоқ хўжалик техникаси заводлари, «Чирчиқмашагро» масъулияти чекланган жамияти каби ўнга яқин корхонада ишлаб чиқарилган қишлоқ хўжалиги техникалари, агрегат ва қўшимча воситалари намойиш этилди.
Ярмаркада вилоятда фаолият юритаётган қишлоқ хўжалик корхоналари, фермер хўжаликлари, пахтачилик кластерлари раҳбар ва мутахассислари замонавий, тежамкор ва ихчам техникалар билан танишди. Жорий йилнинг ўзида вилоятда фермер хўжаликларига техника хизмати кўрсатадиган корхоналар 118 миллиард сўмлик 451 та техника ва бошқа замонавий агрегатлар билан таминланди.
Мазкур кўргазма-ярмаркада тўғридан-тўғри ва лизинг шартлари асосида харид қилиш бўйича 240 дан ортиқ техника, агрегат ва бошқа қўшимча воситалар учун 25 миллиард 294 миллион сўмлик шартнома имзоланди.
Изоҳ (0)