«Арсенал» ҳамда «Барселона» клубининг собиқ ҳужумчиси Тьерри Анри Франциянинг «Монако» клубига бош мураббий этиб тайинланди. Бу ҳақда монегасклар расмий сайти хабар берди.
41 ёшли франиялик мутахассис «Монако» билан 2021 йил июнига қадар шартнома имзолади. Анри 2016 йилдан шу вақтга қадар Бельгия терма жамоасида бош мураббий Роберто Мартинеснинг ёрдамчиси сифатида ишлаб келаётганди.
Маълумот учун, Анри «Монако» клуби тарбияланувчиси ҳисобланади. У клуб сафида 1994—1999 йилларда фаолият олиб борган.
Эслатиб ўтамиз, 11 октябрь санасида қатор омадсизликлардан сўнг «Монако» португалиялик Леонарду Жардимни истеъфога чиқарганди. Клуб жорий мавсумнинг 11 та ўйинида атиги битта ўйинда ғалаба қозонганди, холос. Лига 1 да эса 9 турдан кейин 6 очко билан жамғарган «Монако» 18-ўринни банд этиб турибди.
Жардим клуб сафида 2014 йил ёзидан бошлаб ишлаб келаётганди. Унинг қўл остида жамоа Франция чемпионатининг 2016/17 йилги мавсумида чемпионликка эришганди.
Изоҳ (0)