Параосиё ўйинлари. Ўзбекистон 77 та медаль билан мусобақани якунлади

Индонезия пойтахти Жакарта шаҳрида III Параосиё ўйинлари Ўзбекистон спорт делегацияси учун ниҳоясига етди, деб хабар беради МОҚ матбуот хизмати.

Кеча, 12 октябрь якунларига кўра ўзбекистонлик спортчилар томонидан умумий ҳисобда 77 та медаль қўлга киритилди. Уларнинг 35 таси олтин, 24 таси кумуш ва 18 та бронза медалларидир. Ўзбекистон медаллар сифати бўйича умумжамоа ҳисобида бешинчи ўринни эгаллаб турибди.

Тўрт йил олдин Инчеонда бўлиб ўтган Параосиё ўйинларида ўзбекистонлик спортчилар 22 та олтин, 5 та кумуш ва 4 та бронза, умумий ҳисобда эса 31 та медаль қўлга киритгандилар. Бу сафар эса Параосиё ўйинларидаги рекордлар мутлақ янгиланди ва Ўзбекистон учун энг яхшиси бўлиб тарихга кирди.

Бугун мусобақанинг сўнгги кунида бадминтон, велоспорт ва баскетбол бўйича беллашувлар ўтказилади. Спортнинг ушбу турларида ўзбекистонлик спортчилар иштирок этмайди.