Тошкентда 27—30 ноябрь кунлари PROlogue халқаро кинофестивали бўлиб ўтади

Тошкентда жорий йил 27—30 ноябрь кунлари PROlogue халқаро кинофестивали бўлиб ўтади. Бу ҳақда «Дарё»га Ёшлар медиа маркази маълум қилди.

Илк бор халқаро мақомда ўтказилаётган мазкур нуфузли тадбир Ёшлар иттифоқи томонидан «Ўзбеккино», Тошкент шаҳар ҳокимлиги, Кинематографияни ривожлантириш маркази, Ёш киноижодкорлар кенгаши, Ўзбекистон миллий кинокомиссияси каби бир қатор ҳамкор ташкилотлар билан биргаликда ташкил этилади.

Фестиваль танлов дастури:

Тўлиқ метражли бадиий фильмлар халқаро танлови;

Қисқа метражли бадиий фильмлар халқаро танлови;

Қисқа метражли бадиий миллий фильмлар танловидан иборат.

Фестиваль доирасида конференциялар, мастер-класслар, брифинг, кино соҳасига боғлиқ давра суҳбатлари ва ретро фильмлар намойиши бўлиб ўтиши кўзда тутилмоқда.

Халқаро жюри томонидан энг яхши деб топилган фильм кинофестиваль Гран-Присига сазовор бўлади. Шунингдек, фестивалда бошқа номинациалар бўйича ҳам ғолиблар аниқланади.

Шу билан бирга, фестиваль дирексияси ўзбек ва халқаро кинонинг ривожланишига ўз хиссасини қўшган ижодкорларни совринлар билан тақдирлашни ҳам режалаштирган.

Кинофестивалда иштирок этиш учун талабномаларни 2018 йилнинг 27 октябригача www.prologueфильмфестиваль.com сайтида кўрсатилган талаблар бўйича топшириш имконияти мавжуд.