Самарқанд вилоят ҳокимлиги, вилоят ички ишлар бошқармаси, Ёшлар иттифоқининг вилоят кенгаши ҳамкорлигида «Ёшлар – армиямиз келажаги» шиори остида тадбир ўтказилди. Тадбирда ҳарбий қисм хизматчилари, вилоят ички ишлар бошқармаси ходимлари, «Темурбеклар мактаби» ҳамда Ички Ишлар Вазирлигига қарашли Самарқанд академик лицейи ўқувчилари, миллий гвардия ва Самарқанд халқаро аэропорти чегара назорати ходимлари, 64-сонли махсус мактаб интернати тарбияланувчилари иштирок этишди. Бу ҳақида «Дарё» мухбири Фарҳод Норбўтаев хабар бермоқда.
Тадбирда сўзга чиққанлар ички ишлар тизимида олиб борилаётган ислоҳотлар ва уларнинг самаралари ҳақида гапириб бугун ёшларнинг бу соҳага қизиқишлари жуда юқори эканлигини таъкидлашди. Иштирокчиларнинг турли чиқишлари барчада катта қизиқиш уйғотди.
Ҳарбий қисмнинг «Лочинлар» гуруҳининг кўргазмали чиқишлари, кинология хизмати ўргатилган итларининг турли машқларни бажариши ҳамда инженер муҳандислар, яъни сапёрлар гуруҳининг машғулотлари қатнашчиларда катта таассурот қолдирди.
«Очиқ эшиклар куни» сифатида ўтказилган ушбу тадбир давомида китоблар ярмаркасининг ташкил этилиши ёшларнинг китобга бўлган меҳрини яна бир карра оширди.
Шунингдек ташкилотчилар томонидан футбол мусобақасининг уюштирилиши улардаги спортга бўлган қизиқишларини яна бир марта синовдан ўтказди.
Изоҳ (0)