Нью-Делидаги кўргазма ва бизнес-форумда ўзбекистонликлар 104 млн долларлик шартномаларни имзолади

2018 йил 28—29 сентябрь кунлари Нью-Дели шаҳрида «Ўзбекистонда ишлаб чиқарилган» миллий маҳсулотлар кўргазмаси ва Ўзбекистон-Ҳиндистон бизнес-форуми давомида умумий 104,1 миллион доллар миқдорида 29 та шартнома имзоланди. Бу ҳақда Ташқи савдо вазирлиги матбуот хизмати «Дарё»га маълум қилди.

Икки давлат ташкилотлари ва ишбилармон доираларининг 100 дан зиёд вакиллари иштирок этган ушбу тадбирлар Ўзбекистон Республикаси Президенти Шавкат Мирзиёевнинг Ҳиндистон Республикасига давлат ташрифи доирасида ташкил этилди.

Жумладан, томонлар умумий 102,1 миллион долларлик экспорт шартномалари ва 1 та импорт келишувини (2 миллион доллар) имзолади. Экспорт шартномалари қишлоқ хўжалиги маҳсулотлари (қуритилган мевалар, дуккакли маҳсулотлар, бодом, қизилмия илдизи), кимё, шунингдек текстил маҳсулотлари етказиб беришдан иборат, импорт шартномаси эса қурилиш материалларини сотиб олишни назарда тутади.

Тадбирлар Ўзбекистон Республикаси Инвестициялар бўйича Давлат қўмитаси, Савдо-саноат палатаси, Ташқи савдо вазирлиги ҳамда «Ўзекспомарказ» миллий кўргазмалар мажмуаси томонидан ташкил этилди.