«Ўзбекистон темир йўллари» Тошкент—Поп (Роустон) — Марғилон—Андижон йўналишида экспресс контейнер юк поезди қатновини йўлга қўйди. Бу ҳақда АЖ ахборот хизмати маълум қилди.
20 футлик контейнерларда юклар Тошкентдан Андижонга ва Андижондан Тошкентгача 10 соатда олиб борилади. Агар контейнерлар Поп, Марғилон станцияларига юбориладиган бўлса, у ҳолда яна ҳам қисқа вақтда ўз эгаларига етказилади.
Таъкидлаш жоизки, қиш кунларида Қамчиқ довонидаги тирбандликлар, оворагарчиликлар, ортиқча вақт йўқотишлар тадбиркорларнинг ишларида кўплаб ноқулайликлар келтириб чиқаради. Мазкур экспресс контейнер юк поезди айнан шундай ҳолатларнинг олдини олиш, кичик бизнес ва хусусий тадбиркорлик субъектларини қўллаб-қувватлаш ва уларга қулай шарт-шароитлар яратиш мақсадида йўлга қўйилди.
Платформага контейнерларни ортиш ва тушириш жараёнлари темир йўл томонидан амалга оширилади. Унинг харажатлари ҳар бир контейнер учун тўланадиган умумий тўлов ҳисобига (1 миллион сўм) киритилган. Бугунги кунда тадбиркор бошқа транспорт воситасида Тошкентдан Андижонгача олиб борадиган юки учун 1,5—2 миллион сўм атрофида харажат қилади. Шуни инобатга оладиган бўлса, ушбу экспресс контейнер юк поезди нафақат тадбиркорлар, балки мазкур йўналишда юк жўнатиш истагида бўлган фуқаролар учун ҳам катта қулайлик.
5 октябрь куни дастлабки қатновини бошлаган экспресс контейнер юк поезди ушбу йўналишда ҳафтада 2 марта қатновни амалга оширади.
Кейинчалик буюртмалар ортишига қараб қатновлар сонини кўпайтириш, республиканинг бошқа худудларига ҳам бундай поездлар қатновини йўлга қўйиш кўзда тутилган.
Изоҳ (0)