Ўзбекистонда ишсизлик даражаси жорий йилнинг 1-ярим йиллигида 9,3 фоизни ташкил этди. Бу ҳақда Бандлик ва меҳнат муносабатлари вазирлиги матбуот хизматига таяниб, «Turon 24» хабар беради.
«2017 йилнинг худди шу даври билан қиёслаганда ишсизликнинг ортиши (5,2 фоиз) ишсизлар сонининг кескин кўпайгани билан эмас, балки банд бўлмаган аҳолини ҳисобга олиш методологиясининг такомиллашгани билан боғлиқ», дейилади хабарда.
Ишсизлик даражаси 30 ёшгача бўлганлар орасида 15,9 фоизни, аёллар ўртасида 13,4 фоизни ташкил этган.
Энг кўп ишсизлик даражаси Фарғона (10,0 фоиз), Андижон (9,9 фоиз), Сурхондарё (9,9 фоиз) вилоятларида, энг ками Тошкент (7,8 фоиз) шаҳрида қайд этилди.
Меҳнат ресурслари сони 18,8 миллион кишини ташкил этди, бу 2018 йилнинг биринчи чорагига нисбатан 0,1 фоизга ёки 20 минг кишига ошганини билдиради.
Иқтисодий фаол аҳоли сони 14,6 миллион кишига етди (0,4 фоизга камайган), иқтисодий нофаол аҳоли эса 4,2 миллион кишидан иборат (1,9 фоизга ортган).
Иқтисодиётнинг расмий секторида банд бўлганлар 5,3 миллион кишини ташкил этган (0,6 фоизга тушган), бунда деҳқон хўжаликларида банд бўлган шахслар кўрсаткичи 69,4 фоизга, юридик шахс бўлмаган тадбиркорлар кўрсаткичи 13,8 фоизга ортгани, шу билан бирга, иқтисодиёт соҳасида банд бўлган юридик шахслар кўрсаткичи 1,7 фоизга камайгани қайд этилди.
Уй хўжаликларини текшириш методологиясининг такомиллашуви норасмий секторда банд бўлганларнинг янада ишончлироқ кўрсаткичи — 7,9 миллион кишини (банд бўлганлар умумий сонидан 59,8 фоиз) аниқлашга имкон берди. Улардан вақтинчалик, бир марталик ва мавсумий ишларда банд бўлганлар 1,6 миллион, хорижга ишга кетганлар 2,6 миллион кишини ташкил этади.
Изоҳ (0)