Инновацион ривожланиш вазири ўринбосари Юлбарсхон Мансуров Фудан университети профессори Донг Жинг-Ченг, Ўзбек-Хитой савдо уюшмаси бошқарув кенгаши раиси Чанг Кинг хоним ҳамда мазкур уюшма маслаҳатчиси Қодир Юсупов билан учрашди. Бу ҳақда «Дарё»га вазирлик матбуот хизмати маълум қилди.
Самимий ва дўстона ўтган давра суҳбати натижасида томонлар анъанавий халқ табобати ва замонавий тиббиёт бўйича халқаро тиббиёт форумини ташкил этиш истагини билдирди. Форумда Хитой, Ўзбекистон, Европа мамлакатлари, Ҳиндистон, Корея халқ табобати ютуқлари ҳамда замонавий тиббиётидаги энг сўнгги тадқиқотлар муҳокама қилинади. Биринчи шундай форум Ўзбекистонда ўтказилиши кутилмоқда.
Юлбарсхон Мансуров, ўз навбатида, шарқ табобатини тарғиб қилиш, уни кенг ёйиш билан бир қаторда ўзбек олимлари томонидан кашф қилинган ва эндиликда тижоратлаштирилаётган янги тиббий препаратларни ишлаб чиқаришда ва уни бозорга чиқаришда ҳамкорлик қилиш мумкинлигини таъкидлади.
Меҳмонлар ўзбекистонлик мутахассисларни Шанхай университетига таклиф қилди. Шанхай университети дунёнинг энг етакчи университетларидан бири бўлиб, улар олий таълим муассасаларининг ўз рейтингини ташкил этган. Бу рейтингнинг асосий кўрсаткичи — талабаларга дарс берадиган Нобель мукофоти совриндорлари сонидир.
Изоҳ (0)