Ҳукумат қарорига мувофиқ, ўзбошимчалик билан эгаллаб олинган ер участкалари ёки рухсатнома олмай қурилган турар жойларга нисбатан мулк ҳуқуқини олиш давлат хизматлари марказлари ва кўчмас мулкка нисбатан ҳуқуқни эътироф этиш туман (шаҳар) комиссиялари томонидан амалга оширилади. Бу ҳақда «Дарё»га Давлат хизматлари агентлиги Наманган вилоят бошқармаси маълум қилди.
Бироқ, ўтказилган ўрганишлар ҳамда «Кадастр 2.0» тизимидан олинган маълумотлар таҳлили шуни кўрсатмоқдаки, умумдавлат акцияси доирасида ташкил этилган комиссия ишчи органига комиссия аъзолари томонидан кўчмас мулк объекти бўйича ўз хулосаларини белгиланган муддат мобайнида тақдим қилинмай, қатор қонун бузилиши ҳолатларига йўл қўйиб келинмоқда.
Жумладан, Косонсой тумани ИИБ томонидан 45 та, Янгиқўрғон туман ИИБ томонидан 9 та, Мингбулоқ туман ИИБ томонидан 23 та, Чортоқ туман ИИБ томонидан 22 та, Учқўрғон туман ИИБ томонидан 29 та, Поп туман ИИБ томонидан 50 та, Норин туман ИИБ томонидан 10 та ва Наманган туман ИИБ томонидан 19 та ҳолатда муддат бузилишига йўл қўйишлик, ўзларига юклатилган вазифаларни тўлиқ ижро этмаслик, асоссиз равишда мурожаатларни кўриб чиқиш муддатларига риоя этмаслик ҳолатлари кузатилди. Бунга йўл қўйган масъул шахсларга нисбатан интизомий жавобгарлик масаласини кўриб чиқиш учун вилоят ички ишлар бошқармасига тақдимнома юборилди.
Шунингдек, Наманган шаҳар солиқ инспекцияси томонидан 210 та ва Поп туман солиқ инспекциялари томонидан 64 та, Наманган шаҳар ДСЭНМ томонидан 512 та, Наманган шаҳар Экология ва атроф муҳитни муҳофаза қилиш инспекцияси томонидан 203 та, Наманган шаҳар қурилиш бўлими томонидан 510 та ҳолатда муддат бузилиши ҳолатлари содир этилганлиги аниқланиб, мазкур ҳолатлар юзасидан маъмурий баённома тузилди.
Шунингдек, 5 нафар масъул шахсга нисбатан бошқарма томонидан маъмурий ҳуқуқбузарлик тўғрисидаги иш юзасидан қарор қабул қилинди.
Маълумот учун, жорий йил 15 сентябридан 30 сентябрь кунига қадар давлат марказларига ўзбошимчалик билан қурилган турар жойларга нисбатан мулк ҳуқуқини эътироф этиш бўйича мурожаат қилган фуқаролардан жами 528.739.000 сўм миқдоридаги бир марталик бож ундирилди.
Изоҳ (0)