Журналист Миролим Исажонов Ўзбекистон Республикаси халқ артисти Гавҳар Зокирова билан боғланиб, актрисадан ёш оилаларнинг эрта дарз кетиши масаласи юзасидан шахсий фикр-мулоҳазаларини олди.
— Бу борада ҳар доим бир хил жавобни бераман: бугун оила қураётган ёшларга сабр етишмаяпти. Улар турмушни байрамдан иборат, деб ўйлашади. Ваҳоланки, оила, ҳаёт бу – ҳар кунги тинимсиз меҳнат дегани. Бир спектаклдаги қаҳрамоним, яъни кампир Яратганга илтижо қилиб, «Худо, биламан ҳамма сенга мурожаат қилади ва ҳамма сендан нимадир сўрайди. Мен сендан фақат битта нарса сўрамоқчиман. Менга яқинларимни яхши кўришимга куч-қувват ва сабр-тоқат ато этгин. Чунки муҳаббат лаззат эмас, оғир меҳнат, деб ўргатгансан. Шунинг учун ҳам яқинларимнинг бир-бирларини яхши кўришига куч-қувват ва сабр-бардош туҳфа этгин», деган фикрларни кўзларида ёш билан такрор-такрор айтади. Мен ҳам ёшларимизга сабр, метиндек ирода ва матонат тилайман. Сабаби ёш келин ёки эр ҳозир фақат «мен» деб яшаса, яқин инсонини тушунишга ҳаракат қилмаса, ўзи билан ўзи овора бўлса, буни умуман ҳаёт, деб бўлмайди. Ёнида юрган инсонининг яхши жиҳатларини илғашга интилиши ва уни мақтаб, улуғлаши керак. Ёшлар бир-бирига қараши шарт эмас. Аксинча, улар биргаликда бир томонга қараб, яшашса, ана ўша асл муҳаббат ва бахтли ҳаёт деганидир.
Изоҳ (0)