Халқлар дўстлиги санъат саройи майдонида илк маротаба очиқ осмон остида концерт дастури бўлиб ўтди. Журналист Феруз Муҳаммад ушбу дастурдан «Дарё» учун махсус репортаж тайёрлади.
Маданият вазирлиги ҳамда «Ўзбекконцерт» ДМ томонидан илк маротаба ташкиллаштирилган ушбу дастур жонли ижрода бўлиб ўтди.
Дастурда ёш хонандалардан тортиб Ўзбекистон халқ артисти Озодбек Назарбековгача чиқиш қилишди.
Мазкур концерт дастури ҳақида сентябрь ойининг сўнгги кунларида эълон қилинишига қарамасдан, дастурда кўплаб мухлислар хонандаларнинг жонли ижродаги чиқишларидан баҳраманд бўлишди. Бизнингча кейинди дастурда мухлислар сони бундан ҳам кўп бўлади.
Озодбек Назарбековнинг чиқиш қилиши мухлислар томонидан жуда ҳам илиқ кутиб олинди. Озодбек Назарбеков «Мажнунтолнинг новдалари» қўшиғидан сўнг ҳазил аралаш «очиғини айтсам, сўнгги олти ой мобайнида деярли жонли ижрода қўшиқ айтмадим, шунинг учун қўшиқ сўзлари ҳам эсимдан чиқиши мумкин, келинглар биргаликда куйлаймиз», дея «Келгин гулим» таронасини куйлади. Ушбу таронага барча мухлислар жўр бўлишди.
Очиқ осмон остида бўлиб ўтган дастурда нафақат профессионал ижодкорларга, балки ҳаваскор мухлисларга ҳам куйлаш имкони берилди.
Шунингдек, дастурда Ўзбекистонда хизмат кўрсатган артист Алишер Файз, Абдурашид Йўлдошев, Милена Мадмусаева, Яҳё Мўминов, эстрада хонандалари Баҳром Назаров, Дилшодбек Юнусов, Малика Эгамбердиева, Дилноз, Бекзод Эшонов сингари бир қанча ижодкорлар жонли ижродаги маҳоратларини намойиш қилишди.
«Ўзбекконцерт» ДМ матбуот хизматининг маълумотига қараганда, очиқ осмон остида бўлиб ўтадиган, барча мухлислар учун текин бўлган бундай дастурлар анъанаси ҳали узоқ давом этиши режалаштирилган.
Изоҳ (0)