Фарғона вилоятининг Қува туманида «Мед доктор Арслонов» тиббий диагностика маркази ўз фаолиятини бошлади. Бу ҳақда «Дарё» мухбири Азизжон Эрматов хабар берди.
Мазкур мажмуанинг қурилишига 2,2 миллиард сўм ва 156 минг доллар маблағ сарфланди. Бу ерда 41 та стационар даволаниш хоналари бўлиб, болалар неврологияси, гастроэнтерология, ички касалликлар ва бошқа хасталикларни аниқлаш, сифатли ташхис қўйиш, даволаш учун барча замонавий моддий-техник имкониятлар етарли.
Президентнинг 2017 йил 29 декабрдаги «Хусусий тиббиёт ташкилотларини ривожлантириш бўйича қўшимча шарт-шароитларни яратиш тўғрисида»ги қарори соғлиқни сақлашнинг хусусий секторини ривожлантиришни давлат томонидан ҳар томонлама қўллаб-қувватлашга қаратилган муҳим қадам бўлди. Фарғона вилоятида ҳам тиббиёт соҳасининг хусусий секторини барқарор ривожлантириш, ушбу тармоқ фаолиятини янада кенгайтиришга соғлиқни сақлаш тизимининг давлат соғлиқни сақлаш муассасалари томонидан кўрсатилаётган кенг турдаги тиббиёт хизматларини сифат жиҳатдан юксалтириш ва янада тўлдиришга хизмат қиладиган таркибий қисм сифатида қаралмоқда. Янги ташкил этилган замонавий клиника ҳам соҳага бўлган эътиборнинг амалдаги ифодасидир.
– Марказимиз энг сўнгги русумдаги тиббий жиҳозлар билан таъминланган. Врачларнинг барчаси олий тоифали мутахассислар бўлиб, уларнинг аксарияти хорижий даволаш муассасаларида малака оширган. Улар замонавий тиббий техника ва аппаратларда тегишли муолажа ва операцияларни амалга оширишда етарли тажрибага эга. Шунингдек, клиниканинг ишга тушиши билан 21 янги иш ўрни яратилди, – дейди «Мед доктор Арслонов» масъулияти чекланган жамияти раҳбари Зафаржон Асқаров.
Изоҳ (0)