Индонезияда юз берган зилзила ва унинг оқибатида юзага келган цунами қурбонлари сони 1347 кишига етди. Бу ҳақда «Корреспондент.net» хабар берди.
Аввалроқ зилзиладан омон қолганлар керакли ёрдамнинг етишмаслиги сабабли дўконларни талаб кетаётганлиги, қубонлар сонининг 1200 кишидан ошганлиги ҳақида хабар берилган эди.
Шунингдек, 2 октябрь куни Индонезиянинг Сумба ороли яқинида иккита янги ер силкинишлари қайд этилган. Уларнинг магнитудаси 5,9 ва 6 баллни ташкил қилган.
Магнитудаси 7,7 га тенг бўлган зилзила Индонезияда 28 сентябрь, жума куни юз берди. Ер қимирлаши оқибатида минглаб уйлар, шунингдек, меҳмонхоналар, касалхоналар ва савдо марказлари бузилган. Ерости силкинишидан кейин оролга баландлиги икки метрдан олти метргача бўлган тўлқинлар ёпирилган.
Шунингдек, ҳалокат ҳудудларида вайрон бўлган қамоқхоналардан 1200 нафар маҳбус қочиб кетган. Маҳбуслар учта қамоқхонадан қочган: Палу шаҳрида иккита ва Дунгала туманида битта. Зилзиладан кейин қамоқхоналардан бирининг девори қулаб тушган, бошқасида эса маҳбуслар эшикларни бузган, учинчи қамоқхонада маҳкумлар ҳалокат ҳудудларидаги қариндошлари билан боғланиш учун ёнғин уюштирган. Шу билан бир вақтда, табиий офат сабабли қамоқхоналарда қолган маҳбусларни озиқ-овқат билан тўлиқ таъминлаб бўлмаяпти.
Изоҳ (0)