Россия ФХХ ходимлари томонидан Билимлар кунида теракт содир этишга тайёргарлик кўргани учун қўлга олинган Ўзбекистон фуқароси Муродбек Қодиров бошқа жинояти учун жавобгарликка тортилди. Бу ҳақда «Коммерсантъ» хабар бермоқда.
Терговнинг якуний хулосасига кўра, Қодиров интернетдаги онлайн-трансляция давомида Суриядаги жанговар ҳаракатларда иштирок этаётган ҳарбий қисмда ўзини портлатмоқчи бўлган.
Муродбек Қодиров 2017 йилда қўлга олинганидан сўнг ФХХ ўзбекистонлик 1 сентябрь куни одамлар гавжум бўладиган жойда теракт содир этишга тайёргарлик кўрганликда гумон қилинаётганини маълум қилган, унинг уйидан кучли бомба топилганди.
Судда Муродбек Қодиров айбини тан олиб, Россияга жиҳод содир этиш мақсадида келганини билдирган.
ФХХ ва қўлга олинганидан кейин тергов билан фаол ҳамкорлик қилган Қодировга кўра, у Сурия бомбардимон оқибатида ҳалок бўлган акаси учун қасос олиш мақсадида терактга тайёргарлик кўрган. 2017 йил 29 июль куни Қодиров Telegram орқали ИШИДга қасамёд келтириб, террорчилар етакчиларидан биридан Москва минтақасида теракт содир этиш ҳақида кўрсатма олади.
Қодиров ва унинг шериклари терактни ҳаво-коинот кучлари қисмларидан бирида уюштиришни режалаштиришган. Улар шу тариқа «давлат ҳокимияти идоралари ишини беқарорлаштириш» ва «улар Суриядаги ҳарбий операцияларни тўхтатиш ҳақида қарор қабул қилишига таъсир ўтказиш»ни режалаштиргани иддао қилинади.
Муродбек Қодировнинг ишини кўриб чиққан ҳарбий суд уни 15 йил озодликдан маҳрум этиш жазосини тайинлади. Қодировнинг ҳимоячилари шикоятидан сўнг ишни қайтадан кўриб чиққан Россия Олий суди мазкур ҳукмни ўзгаришсиз қолдирди.
Изоҳ (0)