Вайронкор цунамидан жабрланган Индонезиянинг Сулавеси ороли аҳолиси дўконларни ва ёқилғи қуйиш шохобчаларини талашни бошлади. Бу ҳақда BBC News хабар берди.
Аҳоли вакилларнинг таъкидлашича, ҳеч қандай ёрдам йўқ, улар эса егуликка муҳтож. Бошқаларнинг айтишича, уларда ҳеч нарса қолмаган, болаларни овқатлантириш керак, тезликда ёрдам олишнинг шунчаки бошқа усули йўқ.
Одамлар дўконлардан маҳсулотларни олиб кетмоқда, бутун витриналарни синдирмоқда, ёқилғи қуйиш шохобчаларида ёқилғи қуйиб олмоқда. Кўчалардаги полициячилар эса воқеаларни хотиржам кузатмоқда. Расмийларнинг маълум қилишича, йўқотишлар кейинчалик компанияларга тўлаб берилади.
Шунингдек, ҳалокат ҳудудларида вайрон бўлган қамоқхоналардан 1200 нафар маҳбус қочиб кетган. Маҳбуслар учта қамоқхонадан қочган: Палу шаҳрида иккита ва Дунгала туманида битта. Зилзиладан кейин қамоқхоналардан бирининг девори қулаб тушган, бошқасида эса маҳбуслар эшикларни бузган, учинчи қамоқхонада маҳкумлар ҳалокат ҳудудларидаги қариндошлари билан боғланиш учун ёнғин уюштирган. Шу билан бир вақтда, табиий офат сабабли қамоқхоналарда қолган маҳбусларни озиқ-овқат билан тўлиқ таъминлаб бўлмаяпти.
Магнитудаси 7,7 га тенг бўлган зилзила Индонезияда 28 сентябрь, жума куни юз берди. Ер қимирлаши оқибатида минглаб уйлар, шунингдек, меҳмонхоналар, касалхоналар ва савдо марказлари бузилган. Ерости силкинишидан кейин оролга баландлиги икки метрдан олти метргача бўлган тўлқинлар ёпирилган. Дастлабки маълумотларга кўра, ҳалок бўлганларнинг сони 1200 кишидан ошган. Қурбонлар сонининг ошиши кутилмоқда. Вайронларни очиш учун оғир техника етишмаяпти.
Изоҳ (0)