Ўзбек киноижодкорлари АҚШ кино мактабида меҳмон бўлишди (фото)

Бир гуруҳ ўзбек киноижодкорлари АҚШнинг Калифорния штатидаги Лос-Анжелес шаҳрида жойлашган киноматография мактабида меҳмон бўлишди. Бу ҳақда режиссёр Жаҳонгир Аҳмедов журналист Феруз Муҳаммадга маълум қилди.

‘Ўзбеккин’, Ташқи ишлар вазирлиги ҳамда Ўзбекистоннинг АҚШдаги элчихонаси ҳамкорлигида  АҚШ кино мактаблари, компания ҳамда кино ташкилотлари билан мустаҳкам алоқаларни йўлга қўйиш мақсадида АҚШга келдик.

Жамоамизда, делегация бошлиғи ‘Ўзбеккинў ташқи алоқаларни ривожлантириш бўлим бошлиғи Ғолиб Неъматов, продюсер Зафар Йўлдошев, оператор Жаҳонгир Ибрагимовлар бор.

Сафаримизни АҚШнинг Калифорния штатидаги Лос-Анжелес шаҳрида жойлашган киноматография мактабида меҳмон бўлишдан бошладик. Бу мактаб бакалавр даражасини берадиган, тўрт йўналиш бўйича уч йил давомида ўқитиладиган кино мактаби экан. Ушбу кино мактабида тўрт йўналиш бўйича, яъни кино продюсерлик, кино режиссёрлик, кино операторлик ва анимация бўйича дарс берилар экан.  Бизни қизиқтирган жиҳати шу бўлдики, мазкур мактабда дастлабки бир ярим йил давомида барча талабаларга умумий дарс берилиб, бир ярим йиллик сабоқдан сўнг, қизиқишига, қобилятига қараб, саралаб касбий томонлама йўналишларга ажратилар экан.

Мактабнинг яна бир энг муҳим жиҳати шундаки, ушбу мактаб битирувчилари тўғридан-тўғри Gollywооd’да ишлашга йўналтирилар экан.

Кино мактабнинг ўқитувчилари ва раҳбарияти бизни илиқ кутиб олишди ва ўқув жараёнлари билан тўлиқ таништиришди. Мазкур кино даргоҳида ўзбек киносининг ёш авлоди ҳам таҳсил олиши учун барча маълумотларни, шарт-шароит ҳамда алоқаларни ўрнатиб қайтамиз.

Жаҳонгир Аҳмедов, режиссёр