Қуролли Кучлар академиясида Жакарта ва Палембанг шаҳарларида ўтказилган XVIII ёзги Осиё ўйинларида 10 та олтин, 12 та кумуш, 11 та бронза медални қўлга киритган Мудофаа вазирлиги спорт клуби вакиллари ҳамда «Халқаро армия ўйинлари–2018» мусобақасида Ўзбекистон шаънини ҳимоя қилган ҳарбий хизматчилар билан курсантлар ўртасида давра суҳбати ўтказилди. Бу ҳақда Мудофаа вазирлиги матбуот хизмати «Дарё»га маълум қилди.
«АрМИ—2018» мусобақаси доирасида ўтказилган «Қўшин разведкачилари аълочилари» танловида иштирок этган ҳарбийлар йиғилганларга мусобақа ҳақида ва мусобақагача бўлган тайёргарлик жараёнлари хусусида батафсил маълумот беришди, ҳарбий соҳада эгаллаган билим, кўникма ва тажрибаларини курсантлар билан ўртоқлашди. Шунингдек, ўзбекистонлик ҳарбийларнинг Халқаро армия ўйинларидаги иштироки ҳақида ҳикоя қилувчи видеоролик ҳам намойиш қилинди.
Тадбирнинг яна бир меҳмони ёзги Осиё ўйинлари олтин медали соҳиби, Мудофаа вазирлиги спорт клуби вакили Никита Рафалович эса спортга илк қадам қўйган даврларидан бошлаб эришган ютуқлари, муваффақиятлари, устозлари ҳақида ва Жакартада бўлиб ўтган ўйинлардан олган таассуротларини сўзалаб берди. Жонли мулоқот курсантларнинг кўплаб саволлари билан давом этди.
Эслатиб ўтамиз, жорий йилнинг июль—август ойларида «Ҳарбий олимпиада» номини олган IV Халқаро армия ўйинларида иккинчи бор иштирок этган ўзбекистонлик ҳарбий хизматчилар 6 та совринли ўринни қўлга киритиб, умумжамоа ҳисобида олтинчи поғонани банд этганди.
Индонезияда ўтказилган XVIII Осиё ўйинларида эса Мудофаа вазирлиги спорт клубининг 50 нафар вакили қатнашиб, жами 33 та медалга эгалик қилди. Бу ўзбекистонлик спортчилар томонидан қўлга киритилган умумий медаллар сонининг 47 фоизига тенг дегани.
Изоҳ (0)