Аввал хабар берганимиздек, «Миллий тикланиш« демократик партияси Тошкент шаҳар кенгаши пойтахтдаги моддий-маданий мерос объектларини муҳофаза қилиш ва улардан фойдаланиш ҳолатини ўрганмоқда. Бу ҳақда ЎзА маълум қилди.
Туманлар кесимида олинган маълумотларга кўра, Бектемир туманида биргина «Қўйлиқ ота» моддий- маданий мероси мавжуд.
Қўйлиқ отанинг асл исми Ҳофиз шайх Қўйлиқий бўлиб, самарқандлик ҳазрати Нўғай ота авлодидан, яъни шайхлар сулоласидан.
Ўтган асрнинг эллигинчи йилларида Қўйлиқ ота мақбараси бузилиб кетиш, яъни сув остида қолиш хавфи туғилади. Шунингдек, дарё устига янги кўприк қурилиб, Фарғона йўлини таъмирлаш зарурати пайдо бўлади. Ўшандан сўнг Қўйлиқ ота хоки бошқа жойга, яъни ҳозирги ўрнига кўчирилади. Мустақилликдан сўнг, 1994 йилда махсус лойиҳа асосида мақбара қурилади.
«Қўйлиқ ота»ни ўрганишлар жараёнида мақбаранинг эгалик ҳуқуқи, техник ҳолати, муҳандислик коммуникация тармоқлари билан таъминланганлик даражаси, фойдаланиш ҳолатлари талаб даражасида экани аниқланди. Аммо мақбара ичкариси таъмирга муҳтож. Ҳаво алмашинуви яхши бўлмагани боис, гумбазнинг кўчган жойлари мақбарага киришингиз билан кўзга ташланади.
— Мақбаранинг ички ҳудудини ободонлаштириш ишлари яхши йўлга қўйилган, бироқ бозор, савдо ва овқатланиш шохобчалари тарихий объектга жуда яқин бўлгани учун санитария ҳолати талаб даражасида эмас, – дейди Халқ депутатлари Бектемир туман Кенгаши депутати Хуршид Раҳимгазиев. — Маиший чиқиндилар тўғри келган ерга ташлаб кетаверилган, енгил машиналарни сақлаш учун эса тураргоҳнинг ўзи йўқ. Албатта, маҳаллий зиёратчилар бундай камчиликларни кўрса-да, кўрмаганликка олиб кетаверади. Аммо хорижлик зиёратчиларни бу аҳволда мақбарага олиб келиб бўлмайди. Аввало, атрофни бугунги кун талаб даражасида тартибга келтиришимиз ва мақбарани сайёҳлик харитасига киритишимиз лозим.
Изоҳ (0)