Жорий йилнинг 10 май куни Самарқанд тумани «Ўзбеккент» маҳалла фуқаролар йиғинида жойлашган омборлардан бирига фуқаро К.М. номига Бирлашган Араб Амирлигидан олиб келинган компьютер эҳтиёт қисмлари ва бошқа товар-моддий бойликлари божхона ходими, омбор мудири ҳамда холислар иштирокида кўздан кечирилганда фуқаро К.М божхона ходимидан тегишли божхона ҳужжатларни расмийлаштирмасдан туриб, давлат бюджетига 12 миллион 798 минг сўмлик божхона тўловлари ундирилиши лозим бўлган 7 турдаги товарларни омбордан олиб чиқиб кетишни сўрайди.
«Дарё» мухбири Фарҳод Норбўтаевнинг маълум қилишича божхона ходими фуқаро К.М.нинг ушбу ноқонуний таклифини рад этгани учун К.М. божхона ходимини ҳар хил ножўя сўзлар билан ҳақорат қилиб, унинг шаъни ва қадр-қимматини беодоблик билан қасддан таҳқирлаган.
Мазкур ҳолат юзасидан Самарқанд вилояти божхона бошқармаси томонидан тегишли ишлар амалга оширилиб, хизмат текшируви ўтказилди. Хизмат текшируви хулосаси ва тўпланган ҳужжатлар, фуқаронинг айбини исботловчи видео тасвирлар илова қилиниб, қонуний тўхтамга келиш учун вилоят прокуратурасига юборилди.
Самарқанд вилоят прокуратураси ушбу ҳолат юзасидан М.К.га нисбатан Ўзбекистон Республикаси Жиноят кодексининг 140-моддаси 3-қисми «а» банди билан жиноят иши қўзғатди. Жиноят ишлари бўйича Самарқанд туман судининг ҳукмига кўра фуқаро М.К. ушбу моддада назарда тутилган жиноятни содир этганликда айбли деб топилиб, унга нисбатан энг кам ойлик иш ҳақининг 80 баравари, яъни 13 миллион 779 минг 200 сўм миқдорида жарима жазоси тайинланди.
Шунингдек, қонунбузар Бирлашган Араб Амирлигидан олиб келинган компьютер эҳтиёт қисмлари учун давлат бюджетига 12 миллион 798 минг сўм божхона тўловларини ҳам тўлайди.
Изоҳ (0)