Давлат хавфсизлик хизмати Қашқадарё вилоят бошқармаси ва вилоят прокуратураси ходимлари томонидан Муборак туман ҳокими ёрдамчиси ҳамда молия бўлими бошлиғи пора олаётган вақтда ушланди. Бу ҳақда «Газета.uz» хабар бермоқда.
Муборак туманининг Қорақум қишлоғида 2 километр узунликдаги махсус пиёдалар йўлагини ётқизиш учун қурилиш ташкилоти ҳисоб рақамига 302 миллион сўм ажратилиши лозим бўлган. Бироқ ушбу маблағларни ўтказиш учун Муборак туман ҳокими ёрдамчиси Азизбек Шукуров мазкур пулларнинг 7 фоизи, яъни 21 миллион сўмни талаб қилган.
Тезкор тадбир натижасида у пул маблағларини олаётган вақтда ушланди.
Маълум бўлишича, Азизбек Шукуров пулни Муборак туман ҳокимлиги молия бўлими бошлиғи Самад Қўйлиевга етказиши керак бўлган. У Қаршида ўтказилган тезкор тадбир вақтида 21 миллион сўмни ўз автомобили салонида олаётганда ушланди.
Самад Қўйлиев 2017 йил июнидан буён молия бўлими бошлиғи лавозимида ишлаб келаётган эди.
Мазкур ҳолат юзасидан Қашқадарё вилоят прокуратураси айбланувчиларга нисбатан Жиноят кодексининг 210-моддаси (пора олиш) бўйича жиноий иш қўзғатди, тергов ҳаракатлари олиб борилмоқда.
Изоҳ (0)