Ўзбекистон Республикаси Солиқ кодексининг 272- ва 287- моддаларига асосан эгалигида солиқ солинадиган мол-мулки ва ер участкалари бўлган жисмоний шахслар ҳамда деҳқон хўжаликлари жисмоний шахсларнинг мол-мулк ва ер солиқлари тўловчилари ҳисобланади, деб хабар беради Тошкент шаҳар давлат солиқ бошқармаси Жамоатчилик билан алоқалар ва ҳуқуқий ахборот бўлими.
Бугунги кунда Тошкент шаҳрида мол-мулк ва ер солиғи тўланиши лозим бўлган 629 мингдан ортиқ объект мавжуд. Уларнинг эгаларига давлат солиқ хизмати органлари томонидан жорий йилнинг 20 майига қадар солиқларни тўлаш ҳақидаги маълумотнома юборилган. Ўз навбатида, юртимиз келажаги учун дахлдорлик ҳисси билан яшаётган 606,5 минг нафар фуқаро томонидан мол-мулк ва ер солиқлари бўйича тўловлар амалга оширилган.
«Фуқароларга қулай шарт-шароитлар яратиш мақсадида, солиқ ва бошқа мажбурий тўловларни банкка бормасдан CLICK, U-PAY ва PayMe тўлов тизимлари ёрдамида мобил телефон ёки интернет орқали онлайн режимда тўлаш имконияти яратилган. Ушбу тўлов тизимларидан фойдаланиб, амалга оширилган тўловлар учун қўшимча ҳақ олинмайди.
Унутманг! Сиз тўлаган мол-мулк ва ер солиқлари маҳаллий бюджет даромадларини тўлдириб, юртимизни ижтимоий-иқтисодий ривожлантириш, уй-жой – коммунал хўжалик объектларини таъмирлаш ва маҳаллаларни ободонлаштириш, шу билан бирга аҳолининг ижтимоий эҳтиёжлари учун сарфланади.
Шундай экан мол-мулк ва ер солиқларини 15 октябрдан кечиктирмай тўлашни унутманг!», — дейилади хабарда.
Изоҳ (0)