Самарқанд шаҳри, «Беклар» маҳалласида яшовчи Равшан Яҳёев тадбиркорлик фаолиятини амалга оширишда айрим фуқаролар томонидан тўсқинлик бўлаётганлиги учун катта миқдорда зарар кўраётганлигини билдириб, «Дарё» таҳририятига мурожаат қилди.
Тадбиркорнинг фикрича, Самарқанд шаҳридаги Қозизода Румий кўчаси, 17 «А» ҳамда 17 «B» уй оралиғида архитектура талаблари асосида ёнғин хавфсизлиги автомобилллари кириш учун 7 метр йўл қолдирилган. Бироқ, биргина фуқаро йўлни яна бир метрга кенгайтиришни талаб қилмоқда.
Самарқанд шаҳар ҳокимининг «Н.Хожиев номли ихтисослаштирилган бозор фаолиятини тўхтатиш ва бошқа худудга кўчириш тўғрисида»ги 2011 йил 27 июлдаги №1134-Қ сонли қарорига асосан Равшан Яҳёевга телишли 37.44 квадрат метр ер майдони бузилишга туширилган. Шаҳар ҳокимининг 2012 йил 27 июндаги №1031-К-сонли қарори асосида ушбу бозор ҳудудидаги ер майдони ўрнига Равшан Яҳёевга шаҳардаги Қозизода Румий кўчасида жойлашган кўримсиз гаражларни кўчириш шарти билан савдо ва маданий-маиший хизмат кўрсатиш мажмуаси қурилиши учун 400 квадрат метр ер майдони ажратилган.
Самарқанд шаҳар ҳокими вазифасини бажарувчи Т. Эсергапов томонидан 2018 йилнинг 5- июнь куни №1010-К сонли қарори асосида Равшан Яҳёевнинг хусусий маблағ ҳисобидан амалга оширилган тугалланган объектни фойдаланишга қабул қилиш ҳақидаги Давлат қабул қилиш ҳайъатининг 2017 йил 27- июлдаги 46-сонли далолатномаси тасдиқланиб, объектдан фойдаланиш учун рухсат берилган. Тадбиркор томонидан қурилиш ишлари архитектура талаблари асосида амалга оширилиб, барча ҳужжатлар қонуний тасдиқланган бўлсада, бироқ бугунги кунда фаолиятини юритишда муаммога дуч келмоқда.
– 2012 йилдан буён ушбу маиший хизмат кўрсатиш биносини қураман. Мана, 5 йилдирки топган-тутганимизни шу ерга сарфлаяпман. Ҳозир бундай иморат қуришнинг ўзи бўлмайди. Тадбиркорлик қилиб, қўшимча иш ўрни яратиш мақсадида яхши ниятлар билан ишни бошламоқчи бўлиб турганимизда, кутилмаганда «Зиёлилар» маҳалласидаги 17 «А» кўп қаватли уйда яшовчи, собиқ ички ишлар ходими Толиб Ҳайитов очиқдан-очиқ қаршилик қилишни бошлади, — дейди тадбиркор Равшан Яҳёев. — Президент битта иш ўрни яратган тадбиркорни бошимга кўтараман, деб турган вақтда салкам 15 кишини иш билан таъминлаш кўзда тутилган ошхонани ишга туширолмай турибман. Қолаверса, тез фурсатларда тиббий клиникани ҳам ишга туширишни режалаштирганмиз. Бу ерда ҳам 25 киши иш билан таъминланади. Аммо бир фуқаронинг ҳеч қандай асоссиз қаршилиги сабабли бугун тадбиркорликни бошлолмай турибман.
«Дарё» мухбири Фарҳод Норбўтаевнинг журналистик суриштируви жараёнида маълум бўлишича, «Зиёлилар» маҳалласидаги 17 «А» кўп қаватли уйда яшовчи, собиқ ички ишлар ходими Толиб Ҳайитов икки бино ўртасидан ёнғин хавфсизлиги автомобили ўтиши учун жой қолдирилмаган, деб шикоят қилган. Ваҳоланки, Қозизода Румий кўчасида жойлашган 17 «B» уй ва 17 «А» уйлар оралиғида ёнғин хавфсизлиги автомобиллари кириш учун 7 метр кенгликдаги йўл ажратилган.
– Шаҳар архитектура лойиҳаси асосида бу икки уй орасида 6 метрли йўл қолдирилиши белгиланган. Аммо мен яна қўшимча бир метр ташлаб, йўлнинг кенглигини 7 метр қилдим, — дейди Равшан Яҳёев. — Қурилиш ишлари шаҳар архитектура талаблари асосида қилинган. Ҳамма ҳужжатлари бор. Нимага фаолиятимга қаршилик қилинаётганлигига тушунмаяпман. Ҳозирги кунда катта миқдорда зарар кўрдим. Тадбиркорликни бошлолмаганим етмаганидек, фойдалана олмаётган тайёр бино учун 30 миллион сўм солиқ тўладим. Ҳеч қандай қарздорлик йўқ. Тадбиркорликни бошлаш учун бинони ишга тушира олмаётганлигимиз биз учун қимматга тушяпти.
Равшан Яҳёев икки уй орасидаги 7 метрлик кўчадан ташқари, кўп қаватли уйга кирувчи бошқа бир йўлни таъмирлаб, асфальт қилиб беришни ҳам билдирган. Бироқ, негадир ўша фуқаро буни истамаган. Ваҳолангки, ёнғин хавфсизлиги бўйича қўйилган талабларни 17 «А» уйда яшовчи айрим фуқаролар ҳам бузган. Кўп қаватли уйнинг атрофи ўраб олиниши натижасида бу ерда ёнғин хавфсизлиги автомашинаси кириш имконияти йўқ. Негадир аслида ёнғин хавфсизлиги талабларини бузаётган фуқарога қонуний чора кўриш ўрнига, қурилиш лойиҳаси талаблари асосида ишни амалга оширган тадбиркорга қурилишни қайтадан амалга ошириш талаби қўйилмоқда.
Равшан Яҳёевнинг билдиришича, қурилиш ишлари бўйича Самарқанд шаҳар ҳокимининг ўринбосари Бобур Элмуродов ҳам фуқаронинг талаби бўйича йўлни яна бир метрга кенгайтиришни билдирган. Тадбиркор масаласида мурожаат қилган «Дарё» мухбирига ҳам ҳоким ўринбосари Бобур Элмуродов худди шу фикрни айтиб, бу борада Равшан Яҳёевга ҳаммасини тушунтириб ўтганлигини билдириб ўтди.
— Ҳоким ўринбосарининг талаби бўйича мен йўлни яна бир метрга кенгайтиришим лозим экан. Ахир бу ерга қанча харажат қилинганман. Уни яна бузиб қайта қуришнинг ўзи бўлмайди. Бир иморатни бузиб қайта қуриш осон иш эмас, — дейди Равшан Яҳёев. — Қолаверса, бино лойиҳасини тайёрлаган ташкилотга лойиҳани нотўғри тузиб берганлигини билдириб шикоят қилган эдим. Улар ҳаммаси тўғри амалга оширилганлигини, аслида талаб бўйича 6 метр йўл қолдириш лозимлигини билдирди. Битта аризачининг асоссиз арзи сабаб бугун катта миқдорда зарар кўраётганлигимни наҳотки ҳеч ким тушунмаса?
Биз Толиб Ҳайитов билан гаплашиш учун бир неча бор ҳаракат қилдик. Бироқ, у киши билан гаплашишга бўлган барча уринишимиз самарасиз бўлди. Аниқроғи, Толиб Ҳайитовни ўз уйида учратолмадик.
– Қурилиш ишларини олиб бориш вақтида ҳатто қурувчиларнинг ишига ҳам тўсқинлик қилишди. Уларни ҳақоратлаб, тўғри келган сўзлар билан камситишди. Ишонмасангиз бинода ўрнатилган кузатув камераларидаги видеоларни сизга кўрсатишим мумкин, — дейди Равшан Яҳёев. — Аммо илтимосим сабаб қурувчилар ҳеч қаерга арз қилишмади. Ҳатто улар истаганидек икки уй орасида ариқ қуриб, уни темир панжаралар билан чиройли қилиб ёпиб беришга ҳам рози бўлдим. Бироқ, маҳалладаги болаларни мажбурлаб, тайёр қурилган ариқни кўмиб ташлади. Нега ундай қилганини очиғи ҳозиргача тушунганим йўқ.
Самарқанд вилоят ҳокимлиги томонидан тадбиркорларнинг муаммосини ҳал этиш мақсадида Савдо-саноат палатаси вилоят бўлимида тадбиркорларнинг мурожаатларини қабул қилиш ва мавжуд муаммоларни ўрганиш гуруҳи ташкил этилган. Тадбиркор Равшан Яҳёевни қийнаётган масала бўйича Савдо-саноат палатаси Самарқанд вилоят бўлимига бориб, юзага келган вазиятни тушунтирдик. Ташкилот масъул ходими ҳолатни ўрганиб, Равшан Яҳёевнинг муаммоси Самарқанд шаҳар ҳокимлиги томонидан ҳал қилинишини билдириб ўтди. Яъни Равшан Яҳёевнинг фаолиятига давлат ташкилотлари томонидан ҳеч қандай тўсқинлик бўлмаётганлиги учун унга тўсқинлик қилувчи ҳолатни шаҳар ҳокимлиги томонидан тузилган махсус ишчи гуруҳ ўрганиб, масалани ҳал этиши мумкинлигини билдирди.
Демак, Равшан Яҳёевнинг тадбиркорлик фаолиятига тўсқинлик қилувчи ҳолатга Самарқанд шаҳар ҳокими Фурқат Рахимов ечим топа олади. Ўйлаймизки, шаҳар ҳокими тез орада ушбу масалани ўз жойида ўрганиб, 40 та иш ўрни яратмоқчи бўлган тадбиркорнинг муаммосини ижобий ҳал қилади. Бунинг учун эса ҳокимнинг озгина вақти, тадбиркорнинг эса ҳоким келгунча сабри керак, холос.
Изоҳ (0)