Тожикистонда бўлиб ўтган «Навсоз» кинофестивалида ўзбекистонлик режиссёр Шокир Ҳолиқовнинг «Чой» фильми Гран-прини қўлга киритди, деб хабар беради «Турон24». Кинофестивалда 8 та мамлакатдан 16 та фильм саралаб олинган. 6 та номинация бўйича ғолиблар аниқланган.
Шокир Ҳолиқов нашрга берган интервьюсида бу танловда аввал ҳам қатнашганини, лекин олдинги сафар ўрин олмаганини айтди. «‘Чой’ фильмини диплом иши сифатида суратга олганман. Давомийлиги 16 дақиқа. Сценарий муаллифи – ўзим, оператор – Акмал Маматов, рассом – Эркин Хушматов. Фильмда Ойбарчин Абдуллаева ва Адҳам Юсуфалиев рол ўйнаган. Фильм ғояси ўзимнинг ҳаётий кузатувларимдан олинган. Имконияти чекланган чол, келин ва набираси. Чол ўзининг хонасида ётибди, чой ичмоқчи бўлди. Қарайди: токчада чой турибди. Келинни чақиради, лекин келин боласига қарайман деб кўчага чиқиб кетади. Шунда чол ўзи чойни олишга уринади ва аравачасига ўтириб токчага қараб юради. Лекин ўша чойга ҳам умид қилиб турганлар бор. Шу ерда контраст ҳосил бўлади», — деди режиссёр.
Шокир Ҳолиқов «Чой» фильмининг тасвирга олинганига энди 2 ой бўлганига қарамай, су вақт ичида 5 та халқаро фестивалга қабул қилинганини айтди. «Иккита танлов ўтди, Қозоғистонда «Байканур» қисқа метражли фильмлар фестивалида конкурсдан ташқарида қўйилди. Иккинчиси эса «Навсоз». Қолган 3 та танлов энди бўлади. 23—28-окябр кунлари ўтадиган Ҳиндистондаги «Альфа Мирама-2018» кинофестивали, Қирғизистондаги «Умут» ёш киноижодкорлар фестивали ва Россиянинг Перм шаҳрида бўладиган «Лампа» халқаро қисқа метражли фильмлар танловида ҳам «Чой» фильмим билан иштирок этяпман», — деди у.
Бундан олдинги фильмлари ҳақида гапирар экан, режиссёр «Бизни тушунишмайди» ва «Дилемма»ни санаб ўтди. «Бизни тушунишмайди» фильми 8 та халқаро танловда қатнашган, 4 тасида ғолиб бўлган. «Дилемма» Ўзбекистон миқёсида бўлгани учун халқаро танловларга юборилмаган.
Таъкидланишича, «Навсоз» кинофестивалида Тожикистон 5 та фильм билан, Қозоғистон 3 та фильм, Ўзбекистон, Қирғизистон, Арманистон, АҚШ ва Белоруссия иккитадан қисқа метражли фильм билан иштирок этган.
Изоҳ (0)