Жорий йилнинг 4—6 октябрь кунлари Ўзбекистон миллий телерадиокомпанияси, Россия телевиденияси академияси фонди ва Ўзбекистон электрон оммавий ахборот воситалари миллий ассоциацияси ҳамкорлигида Ўзбекистон-Россия медиа форуми ҳамда «ТЭФИ-Содружество (ТЭФИ-Ҳамдўстлик)» 8-халқаро телевизион фестивали бўлиб ўтади.
Мазкур тадбирда Ўзбекистон ва Россия Федерациясининг етакчи давлат ва нодавлат оммавий ахборот воситаларининг кўзга кўринган ижодкорлари ҳамда журналистларни ва ахборот технологиялари ходимларини тайёрлашга ихтисослашган олий ўқув юртлари профессор-ўқитувчилари ва мамлакатнинг соҳада таҳсил олувчи талабалари иштирок этади. Шунингдек, Ўзбекистон-Россия медиа форумига МДҲ давлатлари, Болтиқ бўйи ўлкалари ва Грузиядан ҳам мутахассислар таклиф этилади.
Форумнинг ОАВ соҳасида ҳамкорлик қисми Ўзбекистон тарихи, маданияти ва унинг туризм салоҳиятидан Россия жамоатчилиги хабардорлигини кенгайтириш, мамлакат телевидение ва радиоэшиттириш соҳаси мутахассисларининг малакасини ошириш, шунингдек, турли жанрдаги телерадио лойиҳаларни, хусусан, ахборот-таҳлилий дастурларни тайёрлаш борасида етакчи рус телерадиокомпаниялари тажрибасини ўрганиш каби масалаларни қамраб олади. Бу жараёнда ўзбекистонлик ва россиялик теле ва радио ижодкорлар бир-бирлари билан ўзаро тажриба алмашиш имкониятига ҳам эга бўлади.
Ахборот агентликлари ўртасидага ҳамкорлик қисмида, Ўзбекистон Республикаси ва Россия Федерацияси ахборот агентликларининг тезкор хабарлар алмашинуви борасида ҳамкорлик қилиш, интернет ахборот ресурсларини янада ривожлантириш, ижтимоий тармоқларнинг жамият ҳаётига таъсирини ўрганиш тенденциялари муҳокама қилинади.
Форумнинг ахборот технологиялари соҳасида ҳамкорлик қисмида эса, АКТ технологиялари паркларини яратиш ва ривожлантириш бўйича тажриба алмашиш, ахборот технологиялари ва коммуникациялар соҳасида кадрлар малакасини ошириш ҳамда миллий интернет ресурсларини ривожлантириш бўйича ҳамкорликни йўлга қўйиш масалалари қамраб олинади.
«ТЭФИ Ҳамдўстлик» халқаро телевизион фестивали эса «Россия телевидение академияси» жамғармаси томонидан бир неча йилдан буён Мустақил Давлатлар Ҳамдўстлиги ва яқин хориждаги телевидение ижодкорлари ўртасида ўтказиб келинади.
Халқаро телевизион фестивалга 2011 йилда асос солинган бўлиб, у илк кунларданоқ МДҲга аъзо мамлакатлар гуманитар ҳамкорлиги жамғармаси ва Россия матбуот ва оммавий коммуникациялар федерал агентлиги томонидан рағбатлантирилиб келинмоқда.
Ҳамдўстлик мамлакатларида ягона ахборот маконини шакллантиришни мақсад қилган фестивалга ҳар йили МДҲнинг бирор мамлакати мезбонлик қилади. Фестиваль мавзулари ҳам хилма-хил. «ТЭФИ Ҳамдўстлик» доирасида экспертлар кенгаши тузилади, соҳанинг тажрибали мутахассислари иштирокида маҳорат дарслари, замонавий телевидениенинг долзарб муаммоларига бағишланган мунозаралар, телевизон ижодий ишлар муҳокамалари, очиқ суҳбатлар ўтказилади. Фестиваль якунида ғолибларга махсус мукофотлар топширилади.
Бу йил фестиваль «Ватан образи: вақт, макон, тақдир» мавзуида ўтказилади.
Изоҳ (0)