«Бунёдкор» клуби устози Миржалол Қосимов футбол бўйича Ўзбекистон олимпия терма жамоасига бош мураббий этиб тайинланди. Бу ҳақда ЎФА матбуот хизмати маълум қилди.
Қайд этилишича, Ўзбекистон футбол ассоциацияси 1-вице-президенти Умид Аҳмаджонов томонидан Олимпия терма жамоаси бош мураббийлигига бир қатор номзодлар кўриб чиқилган ва якунда бош мураббийликка ўзбек футболи афсонаси Миржалол Қосимов номзоди танланган.
Хабарда таъкидланишича, Умид Аҳмаджонов Миржалол Қосимов билан шахсан суҳбатлашиб, Ўзбекистон олимпия терма жамоаси олдида жиддий ва масъулиятли вазифа турганлиги, Ўзбекистондаги барча футбол мухлислари терма жамоани Олимпиадада кўришни интиқиб кутаётганини, уларнинг ишончини оқлаш учун барча куч ва маҳоратни сарфлаш, тинимсиз меҳнат қилиш зарурлигини таъкидлаган. Шунингдек, Олимпия терма жамоасига футболчиларни саралаб олишда холис бўлиш, фақат энг муносибларини танлаб олиш кераклиги борасида ҳам сўз борган.
Миржалол Қосимов эндиликда Олимпия терма жамоаси таркибини шакллантириш ишларини олиб боради. Шунингдек, терма жамоага номзод футболчиларни саралаб бориш, уларни яхлит бир жамоага айлантириш, рақобатбардош, кучли жамоа яратиш ишлари билан шуғулланади.
Қайд этиш жоиз, хабарда Қосимовнинг «Бунёдкор» бош мураббийи сифатида фаолиятини давом эттириши ёки жойини бўшатиб бериши ҳақида маълумот берилмаган.
Изоҳ (0)