Адлия вазирлиги томонидан давлат органлари ичида биринчилардан бўлиб, Республикадаги барча давлат нотариал идоралари нотариусларининг иш фаолияти сифати баҳоланди ҳамда унинг натижалари эълон қилинди.
Баҳолаш нотариусларнинг 2018 йил 1-ярим йилликдаги иш фаолиятини қамраб олган ҳолда ўтказилди.
Сифатни баҳолашда нотариус томонидан расмийлаштирилган нотариал ҳаракатлар сони ва сифати, аҳолига хизмат кўрсатишда қулайлик ва тезкорликнинг таъминланганлилиги, фаолиятидаги ютуқлар ва йўл қўйилган камчиликлар кўлами, касбий вазифаларини бажариш даражаси ҳамда соҳани ривожлантиришдаги фаоллиги ҳисобга олинди. Сифатни баҳолаш ҳар бир кўрсаткич бўйича белгиланган мезонлар асосида жами 100 баллгача тизимда амалга оширилди.
Сифатни баҳолаш натижаларига кўра тўпланган балларга қараб барча нотариуслар ва ҳудудлар рейтинги тузилди.
- Нотариуслар фаолиятини баҳолаш натижалари
28 нафарининг иш фаолияти «аъло»,268 нафариники «яхши»,278 нафариники «қониқарли»ва 77 нафариники эса «қониқарсиз» деб баҳоланди.
Нотариуслар рейтингининг тўлиқ рўйхати билан www.minjust.uz/uz/press-center/announcement/90106/ ҳаволаси орқали танишишингиз мумкин.
- Ҳудудлар рейтинги
Ҳудудлар рейтингида Тошкент, Навоий ва Хоразм вилоятлари юқори ўринларни, Тошкент шаҳри, Жиззах ва Бухоро вилоятлари эса сўнгги ўринларни эгаллади.
- Нотариусларнинг номинациялар бўйича рейтинги
Республика бўйича энг кўп нотариал ҳаракатлар Яккасарой туман 1-сон ДНИ нотариуси Ғ. Эшмонов (49 433 та), Шайҳонтоҳур туман 4-сон ДНИ нотариуси Т. Усманов (31 590 та) ва Яккасарой туман 2-сон ДНИ нотариуси Г. Якубова (28 317 та) томонидан амалга оширилган.
Мураккаб турдаги (гаров, ипотека шартномалари ва мерос) нотариал ҳаракатлари бўйича:
Энг кўп меросга бўлган ҳуқуқ тўғрисида гувоҳнома Учтепа туман 7-сон ДНИ нотариуси Д. Курбанова (318), Янгиқўрғон туман ДНИ нотариуси Ю. Сотимов (289 та) ва Андижон шаҳар 1-сон ДНИ нотариуси А. Шербаев(280 та) томонидан;
Энг кўп гаров шартномалари Бувайда туман давлат нотариал идораси нотариуслари I. Исмаилов (1 858 та), Л. Гуломов (1 112) ва Шайхонтоҳур туман 7-сон ДНИ нотариуси I. Мустафаева (718) томонидан;
Энг кўп ипотека шартномалари Қарши шаҳар 3-сон ДНИ нотариуси Ю. Узаков (521 та), Фарғона шаҳар 6-сон ДНИ нотариуси А. Ашуров (274 та) ва Қарши шаҳар 6-сон ДНИ нотариуси К. Хуррамов (262 та) томонидан расмийлаштирилган.
Нотариал хизматларни кўрсатишда аҳолига қулайлик яратиш мақсадида 413 нафар нотариуслар томонидан маҳалла фуқаролар йиғинлари биноларида аҳоли хонадонларига чиқиб 12 218 та сайёр нотариал ҳаракатлар амалга оширилган.
Энг кўп сайёр нотариал ҳаракатлар Каттақўрғон туман 1-сон ДНИ нотариуси Ш. Рахимов (172 та), Бухоро шаҳар 9-сон ДНИ нотариуси Э. Шеров (139 та) ва Самарқанд шаҳар 10-сон ДНИ нотариуси К. Жўраев (138 та) томонидан расмийлаштирилган.
Шунингдек, таҳлил қилинган даврда нотариуслар томонидан 4 256 та ҳуқуқий тарғибот ва бошқа тадбирлар ўтказилган ҳамда соҳани ривожлантириш юзасидан 383 та таклифлар киритилган.
Республика бўйича 27 нафар нотариусларнинг ноқонуний хатти-ҳаракатлари юзасидан келиб тушган шикоятлардаги важлар ўз тасдиғини топган ва нотариусларга нисбатан тегишли интизомий жазо чоралари қўлланилган.
Баҳолаш натижаларига кўра, иш фаолияти «аъло» баҳоланган нотариусларни рағбатлантириш ва иш фаолияти «қониқарсиз» деб топилган нотариусларнинг фаолиятини яхшилаш бўйича «йўл хариталари» ишлаб чиқиш белгиланди.
Нотариуслар иш фаолияти ҳар ярим йил якуни бўйича Адлия вазирлиги томонидан баҳоланиб, янгиланган рейтинг ОАВларда эълон қилиб борилади.
Давлат нотариал идоралари нотариуслари фаолияти сифатини баҳолаш бўйича таклифлар, соҳадаги қонун бузилиши ҳолатлари юзасидан мурожаатларни Адлия вазирлигига бевосита «1008» ишонч телефони ёки вазирликнинг ижтимоий тармоқлардаги саҳифалари орқали ҳамда info@minjust.gov.uz электрон почтасига йўллаш мумкин.
Изоҳ (0)