Жорий йилнинг 20 сентябрь куни Беларусь Республикаси Адлия вазирининг ўринбосари Игорь Тушинский бошчилигидаги делегация Наманган шаҳридаги Давлат хизматлари марказининг тажрибасини ўрганиш учун ташриф буюрди. Бу ҳақда марказ хабар берди.
Делегацияни Наманган вилояти Давлат хизматлари бошқармаси бошлиғи Дилмурод Исмоилов кутиб олди. Давлат хизматлари агентлиги директори ўринбосари Нўъмон Муҳаммадиев билан биргаликда меҳмонларни давлат хизматлари кўрсатишнинг миллий тизими, Намаган мисолида марказларнинг фаолияти билан таништирди. Мазкур марказ зарур бўлган замонавий ускуналар билан жиҳозланган энг катта ва намуналилардан бири.
Д. Исмоилов «ягона дарча» тамойилини амалга ошириш, шунингдек, марказларда давлат хизматларини кўрсатиш соҳасидаги афзалликлар ҳақида сўзлаб берди. Делегатларга электрон навбат тизимини, баъзи давлат хизматларини олиш жараёнини тақдим этишди. Марказга ташриф буюрувчилар қулайлиги учун ўзидаёқ жойлашган болалар ўйин майдончаси ҳамда кафега экскурсия ўтказишди.
Шунингдек, «мобил» сайёр хизматлари кўрсатиш ҳақида маълумот берилди. Maxсус техника билан жиҳозланган автобус ва Damas автомобилларини тақдим этишди.
Тадбир якунида Беларусь Республикалик меҳмонлар самимий қабул учун миннатдорчилик изҳор этди ҳамда давлат хизматларини ташкил этиш ва такомиллаштириш бўйича мамлакатда олиб борилаётган ишларни қўллаб-қўвватлади.
Эслатиб ўтамиз, бугунги кунда Наманган Давлат хизматлари маркази экспериментар марказлардан бири бўлиб, 100 га яқин давлат хизматларини кўрсатади. Бу марказ Наманган шаҳрининг аҳолисига паспорт берадиган ва янгилайдиган ягона марказдир. Бу ерда бир кунда 800 дан зиёд фуқарога хизмат кўрсатилади. Марказ биносида Президент Халқ қабулхонаси, ФҲДЁ бўлинмаси, суғурта, кадастр, ҳайдовчилик гувоҳномасини алмаштириш, тез ёрдам ва банк филиаллари мавжуд.
Изоҳ (0)